Altyn baǵasy 3 myń dollar shegine jaqyndady

ASTANA. KAZINFORM — Beısenbide altynnyń baǵasy rekordtyq deńgeıge kóterilip, bir ýntsııa úshin 3 myń dollarǵa jaqyndady, dep habarlaıdy CNBC.

Altynnyń spot baǵasy 1,6% qymbattap, ýntsııasy úshin 2 977,36 dollardy qurady. Bul — 2025 jyly naryqtaǵy 12-shi eń joǵary kórsetkish.

Jyl basynan beri baǵalar 2024 jyly 27%-ǵa jyldam óskennen keıin 14%-ǵa jýyq ósti. AQSh-ta altyn fıýchersteri 1,4%-ǵa ósip, 2989 dollardy qurady. 

— Altyn uzaq merzimdi «buqalar» naryǵynda tur. Baǵalar bıyl 3000 dollardan 3200 dollarǵa deıin ózgeredi dep boljap otyrmyz, — dedi «Allegiance Gold» bas operatsııalyq dırektory Aleks Ebkarıan.

AQSh prezıdenti Donald Tramptyń turaqsyz saýda saıasaty ınvestorlar geosaıası jáne ekonomıkalyq kúızelis kezinde satyp alǵandy jón kóretin altynnyń baǵasyn sharyqtatyp otyr.

— Tarıfterdiń ózgerýine qatysty jalǵasyp jatqan belgisizdik shynymen altynǵa degen tábetti kúsheıtip keledi — dedi «Standard Chartered» sarapshysy Sokı Kýper.

Taǵy bir sebep — Qytaı Halyq bankiniń Qytaı aqpan aıynda tórtinshi aı qatarynan altyn satyp alýyn jalǵastyrǵany týraly derekter.

Buǵan deıin Qazaqstan aımaqtarynda altyn quny qandaı ekenin jazǵan bolatynbyz.