Altyn alam dep kelip edim, qola da buıyrmady – Sáken Bıbosynov

PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynyń shırek fınalynda óner kórsetip, utylyp qalǵan Sáken Bıbosynov osy kezdesýge qatysty pikir bildirdi.

«Óte ókinishti boldy. Altyn alam dep kelip, qolaǵa da qol jetkize almadym. Bul joly basty qarsylasymnan esemdi qaıtaram dep oılaǵanmyn. Bári kerisinshe boldy. Sharshy alańda barymdy saldym. Biraq tóreshi qarsylasymynyń qolyn kóterdi. Demek, sol jeńdi. Men elimizdiń namysyn qorǵaı almadym», - dedi jekpe-jekten keıin Sáken Bıbosynov.

Esterińizge sala keteıik, osyǵan deıin Bıbosynov ejelgi qarsylasy ózbekstandyq Hasanboı Dýsmatovtan utylyp qalǵanyn jazǵan bolatynbyz.

Aıta keteıik, búgin qazaqstandyq sportshylar sporttyń 8 túrinen - stendtik atý, akademııalyq esý, dzıýdo, jeńil atletıka, júzý, semserlesý, boks jáne batýt gımnastıkasynan baq synady. Búgingi sportshylar arasynda eń úzdik nátıjeni boksshy Nurbek Oralbaı kórsetti. 80 keli salmaqta otandasymyz shırek fınalda Ázerbaıjan boksshysy Mýrad Allahberdıevti utyp, jartylaı fınalǵa shyqty.