«Altyn adam»: otandyq mýltfılm kınoteatrlarda kórsetile bastady
ASTANA. KAZINFORM — 5 maýsymnan bastap elimizdiń barlyq kınoteatrynan «Altyn adam» anımatsııalyq fılmi kórsetile bastady.
Jibek Joly arnasynyń «Búgin LIVE» baǵdarlamasyna qonaq bolǵan túsirilim tobynyń músheleri barsha qazaqstandyqty otandyq ónimdi qoldaýǵa shaqyrdy.
— Kórermen fılmdi óte ystyq qabyldap jatyr. Fılm shyqpas buryn balalar men ata-analarǵa arnaıy kórsettik. Mátinmen jumys isteý barysynda da kóptegen máselege den qoıyldy. Osy sátti paıdalana otyryp, barlyq ata-anaǵa demalys ýaqytynda balalaryn osy fılmge aparýǵa shaqyramyn. Osyndaı qundy, tarıhı dúnıelerdi kórsetip, óskeleń urpaqty tárbıelik máni bar dúnıelermen sýsyndataıyq dep aıtqym keledi. «Otan otbasydan bastalady» deımiz ǵoı. Balalar ózderi bılet alyp, kınoteatrlarǵa bara almaıdy ǵoı. Sondyqtan ata-analar tarapynan osy dúnıege den qoıylyp, ulttyq fılmderdi otandyq prokatta qoldasa deımin, — dedi Ulttyq kınony qoldaý memlekettik ortalyǵy basqarma tóraǵasynyń orynbasary Ádilet Omarov.
Al stsenarıst Ularbek Nurǵalymuly anımatsııalyq fılmniń kórermenge bereri mol deıdi.
— Stsenarıı jazylar kezde qazirgi balalardyń túsinigi de eskeriledi. Alǵashqy kórsetilim bolǵanda sol balalardyń áserin baqyladyq. Bul anımatsııalyq fılmniń kórermenge berer dúnıesi mol dep oılaımyn. Bul jaı ǵana oıyn-kúlkiniń aınalasyndaǵy dúnıe emes. Biz qazir «bala ǵoı» dep óte jeńil dúnıelerdi kórsetip jatqan sekildimiz. Al negizi balalardyń osyndaı ósý kezeńindegi oılaý deńgeıi múldem basqasha bolady. Tipti, bizde kúnige sózdik qor 1-2 sózge ǵana tolyǵyp otyrýy múmkin, biraq balalarda júzdegen sóz qosylyp otyrady. Balalardyń damýynda erekshe jyldamdyq bar. Sony eskere otyryp, osy fılmde salmaqtyraq dúnıelerdi qosýǵa tyrystyq, — deıdi ol.
«Altyn adam» anımatsııalyq fılminiń stsenarıı avtory balalarǵa arnalǵan fılmniń stsenarııin jazý qıyn ekenin aıtady.
— Jalpy balalarǵa stsenarıı jazý óte qıyn. Keı nárseni tarqatyp, túsindirip jazý kerek. Eresek adamdar ondaı dúnıelerdi ońaı túsine beredi ǵoı. Biz bul fılmge stsenarııdi rejıssermen birge jazdyq. Rejısser — Turdybek Maıdan. Ideıa da sol kisiniki. Stsenarıı jazar aldyn men odan: «Ne oı aıtqyń keledi, ne kórsetkiń keledi?» — dep suradym. Sonda ol: «Biz Altyn adamnyń syrtyn bilemiz, men sol Altyn adamnyń ishin kórsetkim keledi», — dedi. Sol nárse meniń kóńilime qondy. Sodan soń bas keıipkerdiń jan dúnıesine batyrlyq, parasattylyq, ádilettilik jáne izgilik degen 4 qasıetti qostyq ta, sol tórteýi tórt jebe boldy. Basty keıipker qaǵan bolǵan kezde onyń qolynda 3 jebe boldy. Solaı ol qalǵan izgilik degen 1 jebeni izdeıdi. Fılmde sol izdeý barysyndaǵy qaǵannyń bastan keshken qıyndyqtary kórsetiledi, — deıdi stsenarıst.
Jaqynda ǵana tusaýy kesilgen týyndyny kórermenge usyný úshin 100-ge tarta maman qyzmet etipti.
— Anımatsııa — bul basqa salalardan erekshe. Onyń óndirisi de óte uzaq ýaqytty talap etedi. Ol jaqta mamandar, jalpy aıtqanda, zergerlik jumyspen aınalysady. Ár keıipkerdi zerdelep salyp otyrý, ár keıipkerdiń qımylyn árbir sekýndqa sáıkestendirý — bul úlken qajyrly eńbekti talap etedi. Sýretshiler, anımatorlar, rejısserler syndy jalpy óndiriste 70 shaqty adam jumys istedi. Odan bólek taǵy 30-ǵa jýyq maman dýblıajben aınalysty. Dýblıajǵa kastıng úlken boldy. Óıtkeni balanyń daýysyn, árbir qımylyn berý óte qıyn. Bul jerde basty róldi rejısserdiń uly Aımaýyt dybystaıdy. Saýndtrekti de osy bala oryndady. Mýltfılmniń saýndtregi de óte sátti shyqqan. Keshe de kórermender: «Qaıdan tyńdasaq bolady, bul án qaı platformada bar?» — dep surap jatyr. Bul fılmniń kórermen arasynda da taralýyna kóp úles qosady, — deıdi Ulttyq kınony qoldaý memlekettik ortalyǵy basqarma tóraǵasynyń orynbasary.
Mamannyń aıtýynsha, fılm tek Qazaqstan aýmaǵynda emes, alys-jaqyn shet elderde de dáriptelmek.
— Osy kınoteatrlardaǵy prokattan keıin biz telearnalarda mindetti túrde kórsetemiz. Bizdiń Ulttyq kıno ortalyǵynyń Kınopoısk-te arnaıy sóresi paıda boldy. Sondaı strımıngtik platformalarda da jarııalanady. Qazir túrli platformalardan bizge kóptegen usynys kelip jatyr. Soǵan oraı biz bul jobany tek Qazaqstanǵa emes, shet memleketterge de dáripteýge bar kúshimizdi salamyz, — deıdi Ádilet Omarov.
Buǵan deıin jańa kıno aptalyǵynda Kazinform nazar aýdarýǵa turarlyq fılmderdi saralap shyqty.