«Altyn adam» fılmi Iordanııadaǵy kınofestıvalde kórermendi tánti etti
ASTANA. KAZINFORM - Qazaqstandyq «Altyn adam» anımatsııalyq fılmi Iordanııada ótken IV Halyqaralyq balalar kınofestıvalinde kórermen kózaıymy júldesin jeńip aldy.
Fılm QR Mádenıet jáne aqparat mınıstrliginiń tapsyrysy boıynsha, Ulttyq kınony qoldaý memlekettik ortalyǵynyń qoldaýymen Sh.Aımanov atyndaǵy «Qazaqfılm» kınostýdııasynda túsirilgen. Rejısserleri – Turdybek Maıdan men Tilek Tóleýǵazy, stsenarıı avtorlary – Ánnas Baǵdat pen Ularbek Nurǵalym.
Atalǵan festıval 15-21 tamyz aralyǵynda Iordanııanyń Koroldik kınokomıssııasynyń uıymdastyrýymen, Jálılá bınt Álı hanshaıymnyń qoldaýymen ótti.
Baıqaý baǵdarlamasynda Qazaqstan, Qytaı, Nıderland, Latvııa syndy elderden kelgen balalar men jasóspirimderge arnalǵan úzdik fılmder kórsetildi. «Altyn adam» fılmi otandyq kınoteatrlarda 5 maýsymnan bastap prokatta bolǵan.
Týyndyda Han Táńiri shyńyna shyqqan saq jaýyngeriniń sapary baıandalady. Kartına batyldyq pen erlik, adaldyq pen ar-namys jaıynda.
Jobanyń basty maqsaty – balalar men jasóspirimderdi izgilikke baýlyp, rýhanı qundylyqtardy boıyna sińirý.
Aıta keteıik, qazaqstandyq kınorejısser Erevanda álemdik kınoǵa qosqan úlesi úshin marapattaldy.