Alty jylǵa sottalǵan Jaqsylyq Omardyń úkimin apellıatsııa ózgerissiz qaldyrdy
ÓSKEMEN. KAZINFORM — Para alǵany jáne alaıaqtyq jasaǵany úshin 6 jylǵa bas bostandyǵynan aıyrylǵan Óskemenniń eks-ákimi, ShQO ákiminiń birinshi orynbasary bolǵan Jaqsylyq Omardyń apellıatsııalyq soty ótti.
20 mamyrda ShQO sotynyń qylmystyq ister jónindegi sot alqasynda Jaqsylyq Omardyń apellıatsııalyq isi qaraldy.
— Aıyptalýshy Óskemen qalasynyń qylmystyq ister jónindegi aýdanaralyq sotynyń úkimimen QR QK-niń 190-baby 3-bóliginiń 1 jáne 2-tarmaqtary, 366-baby 3-bóliginiń 3-tarmaǵy boıynsha (alaıaqtyq jáne para alý) sottalǵan bolatyn. Birinshi satydaǵy sot úkimimen Jaqsylyq Omar múlki tárkilenip, memlekettik qyzmette jumys isteýge ómir boıyna tyıym salyna otyryp, 6 jyl merzimge bas bostandyǵynan aıyrylǵan. Іs jábirlenýshi men qorǵaýshylardyń apellıatsııalyq shaǵymdary negizinde qaraldy. Olar taǵaıyndalǵan jazamen kelispeı, ony tym qatań dep sanaǵan, — dep habarlady ShQO sotynan.
Sot alqasy birinshi satydaǵy sot aıyptalýshynyń áreketterin durys saralaǵan, al jaza túri men mólsheri zań talaptaryna qatań sáıkes taǵaıyndalǵan degen qorytyndyǵa keldi.
— Sondaı-aq sot aýyr sybaılas jemqorlyq qylmysynyń qoǵamdyq qaýiptiligin, memlekettik bılik bedeline jáne qoǵamnyń oǵan degen senimine nuqsan keltiretinin eskerdi. Sot alqasynyń qaýlysymen birinshi satydaǵy sot úkimi ózgerissiz qaldyryldy, — delingen aqparatta.
Eske salsaq, Eske salsaq, buǵan deıin Jaqsylyq Omardyń 6 jyl merzimge bas bostandyǵynan aıyrylǵany habarlanǵan. Sondaı-aq onyń múlki, ıaǵnı Toyota Camry avtokóligi tárkilenip, memlekettik qyzmette laýazym atqarý quqyǵynan ómir boıyna aıyryldy.
Keıin Jaqsylyq Omardyń raqymshylyqqa ilinbeıtini habarlandy. Sebebi qoldanystaǵy qylmystyq zańnama talaptaryna sáıkes, sybaılas jemqorlyq qylmystary úshin sottalǵan tulǵalarǵa raqymshylyq aktileri men shartty túrde merziminen buryn bosatý normalary qoldanylmaıdy.
