Alty jyl ishinde 200-den asa shaǵym: SQO turǵyny ádildik izdep júr
PETROPAVL. KAZINFORM — Soltústik Qazaqstan oblysynyń turǵyny Oleg Aab áleýmettik jeli arqyly Prezıdentten kómek surady.
Aıtýynsha, ol bul qadamǵa amalsyzdan baryp otyr. Ǵ.Músirepov atyndaǵy aýdannyń ýchaskelik ınspektory Rýslan Qoıanbaev óz isine salǵyrt qaraýynyń saldarynan, onyń 8 jasar qyzymynyń moıyny, kómeıi jaraqattanyp, densaýlyǵyna aýyr zııan keldi.
— Drýjba eldi mekeninde jol qıylysynda jol-kólik oqıǵasy bolyp, oǵan ýchaskelik polıtsııa ınspektory keldi. Jedel-tergeý toby jetkenshe polıtsııa qyzmetkeri eki turǵynmen birge oqıǵa ornyna jip tartyp qoımaq bolady. Úıden aq kapron jip ákelip, jol qıylysyn tórt jaǵynan, qorshaýdan ekinshi úıdiń qorshaýyna deıin tartady. Ol aq jip jedel-tergeý toby kelgenshe sol jerde 5,5 saǵattan astam ýaqyt boıy tartylyp turdy. Sol kúni men 8 jasar qyzymmen balalar alańyna barý úshin aýladan shyqtyq. Meniń qyzym velosıpedte boldy. Jol jıegimen bara jatty, men onyń artynan 15-20 metrdeı jerde kele jatqanmyn. Qıylysqa jetken kezde qyzym mingen velosıped ushyp ketti, al qyzym aýada ilinip qaldy. Júgirip jetkenshe deıin tartylǵan jiptiń serippesimen qyzym jol jıegine qulady. Jetken kezde qyzymnyń es-tússiz jatqanyn kórdim. Al moınynda jyrtylǵan-kesilgen jara boldy, — deıdi aýyl turǵyny.
Osy oqıǵadan keıin Oleg Aabtyń qyzy áli kúnge deıin sol jaraqattyń zardabyn tartyp keledi. Er adam elimizdiń quqyq qorǵaý organdaryna 200-den astam aryz-shaǵym jazyp, qaldyrǵan. Alaıda nátıje bolmady.
— QR Іshki ister mınıstriniń orynbasarlarymen birneshe ret kezdestim, keıin mınıstr Ahmetjanovpen de sóılestim. Meniń qyzymdy qorǵaýyn suradym. Ádilet vıtse-mınıstri Madalıevpen úsh ret, mınıstr Mýsınmen kezdesip, tergeý barysynda olqylyqtar jiberilgenin, zańsyzdyqqa jol berilgenin aıttym. Alty ret júrgizilgen sot-medıtsınalyq saraptamanyń barlyǵy ózara kelisimmen jasalǵan. Bas prokýrordyń birinshi orynbasary Táshimbaevtyń qabyldaýynda da boldym. Qyzymdy qorǵap, quqyǵyn qalpyna keltirýdi ótindim. Zań jáne ar-uıat boıynsha istiń mán-jaıyn anyqtaýyn suradym, — deıdi Oleg Aab.
SQO polıtsııa departamenti osy máselege qatysty túsinik berdi.
— Oqıǵa 2020 jyly 11 shildede bolǵan. Ǵ.Músirepov atyndaǵy aýdandyq polıtsııa bólimine Drýjba eldi mekenindegi jol qıylysynda ÝAZ avtokóligi men mototsıkl soqtyǵysyp qalǵandyǵy týraly habar tústi. Jedel-tergeý toby jetkenge deıin aýyl turǵyndary oqıǵa ornyn ózdiginen kapron jippen qorshaǵan. Saldarynan velosıped teýip júrgen 2012 jyly týǵan qyz bala moınyn jaraqattady. Bul fakti polıtsııa bóliminiń esep kitabynda tirkeldi. Sot-medıtsınalyq saraptamanyń qorytyndysy boıynsha qyzdyń densaýlyǵyna jeńil zııan kelgen. Osy oqıǵaǵa baılanysty qyzmettik tekseris júrgizilip, onyń qorytyndysy boıynsha polıtsııa bóliminiń qyzmetkerleri tartyptik jazaǵa tartyldy, — delingen jaýapta.
Vedomstvonyń málimetinshe, bul istiń materıaldary 2024 jyldyń qarasha aıynda QR Sybaılas jemqorlyqqa qarsy is-qımyl agenttigine berildi.
Buǵan deıin SQO-da esirtkimen ustalǵan áıel 11 jylǵa bas bostandyǵynan aıyrylǵanyn jazǵan edik.