Alty óńirde kommýnaldyq ınfraqurylymdy jańartýǵa 27,3 mlrd teńge bólinedi
ASTANA.KAZINFORM — «Qazaqstan Turǵyn úı Kompanııasy» AQ «Energetıkalyq jáne kommýnaldyq sektorlardy jańǵyrtý» ulttyq jobasy aıasynda jalpy somasy 27,3 mlrd teńgege alty óńir ákimdikteriniń oblıgatsııalaryn satyp aldy.
Qarajat qandaı jumystarǵa baǵyttalady?
Jobalar Shyǵys Qazaqstan, Jambyl, Jetisý, Batys Qazaqstan, Qaraǵandy jáne Qostanaı oblystarynda qarjylandyrylady. Qarajat sýmen jabdyqtaý, sý burý jáne jylýmen jabdyqtaý júıelerin rekonstrýktsııalaýǵa, sondaı-aq kommýnaldyq ınfraqurylymǵa tsıfrlyq sheshimderdi engizýge baǵyttalady.
Qandaı jobalar iske asyrylady?
Shyǵys Qazaqstan oblysynda Óskemende sý qubyry jelileri jańartylady, onyń tozýy 59% -dan asady.
Jambyl oblysynda Taraz qalasynyń sý qubyry men jylý jelileri qaıta jańǵyrtylady. Sý qubyrynyń bir bóligi 60 jyldan astam ýaqyt paıdalanylýda, al jekelegen ýchaskelerdiń tozýy 95% -ǵa jetedi.
Jetisý oblysynda jylý, sý qubyry jáne káriz jelilerin jańǵyrtý, sondaı-aq sýmen jabdyqtaý jáne sý burý nysandaryn avtomattandyrý boıynsha jeti joba iske asyrylýda.
Batys Qazaqstan oblysynda Aqsaıda káriz jelileri jańartylady, onda ınfraqurylymnyń ortasha tozýy 79% -dan asady.
Qaraǵandy oblysynda «Qaraǵandy Sý» JShS-niń sý tazartý kesheni jańǵyrtylady.
Qostanaı oblysynda jylý jelileri jańartylyp, Rýdnyı, Lısakov jáne Jitiqara qalalarynda energııa resýrstaryn esepteýdiń avtomattandyrylǵan júıeleri engiziledi.
Turǵyndar úshin ne ózgeredi?
Jobalardy iske asyrý kommýnaldyq ınfraqurylymnyń tozýyn tómendetýge, jylýmen jáne sýmen jabdyqtaýdyń senimdiligin arttyrýǵa, resýrstardy joǵaltýdy qysqartýǵa jáne kommýnaldyq qyzmetterdiń sapasyn jaqsartýǵa múmkindik beredi. Tek Qaraǵandy oblysynda ǵana 695 myńnan astam turǵyn, Jetisý oblysynda 60 myńnan astam adam sapaly sýmen qamtamasyz etiledi, basqa óńirlerde jobalar ondaǵan myń qyzmet tutynýshylar úshin jaǵdaıdy jaqsartady.
Jobalar qalaı qarjylandyrylady?
«Qazaqstan Turǵyn úı Kompanııasy» AQ tabıǵı monopolııa sýbektilerin memlekettik qatysýy bar kásiporyndar úshin ákimdikter oblıgatsııalaryn satyp alý jáne jeke menshik tabıǵı monopolııa sýbektileri úshin kredıtterdi sýbsıdııalaý arqyly qarjylandyrady.
2026 jylǵy 26 maýsymdaǵy jaǵdaı boıynsha kompanııa 11 JAO-nyń memlekettik baǵaly qaǵazdaryn 104,3 mlrd teńge somasyna satyp aldy.
Aıta ketelik energetıkalyq ınfraqurylym obektileri kúzet aımaqtarynyń biryńǵaı tsıfrlyq tizilimi qurylatyny týraly jazǵan edik.
