Alty eldiń jastary qatysatyn «Aıbyn-2026» áskerı jıynyna daıyndyq qalaı
ASTANA. KAZINFORM – Qorǵanys mınıstri, avıatsııa general-leıtenanty Dáýren Qosanov Býrabaı kýrorttyq aımaǵynda ótetin «Aıbyn-2026» halyqaralyq áskerı-patrıottyq jastar jıynyna daıyndyq barysymen tanysty.
Shoqan Ýálıhanov atyndaǵy áskerı kolledjdiń «Amandyq» polıgonynda ótken ınspektsııalyq is-sharalarǵa Aqmola oblysynyń ákimi Marat Ahmetjanov ta qatysty.
Áskerı kolledj basshysy mınıstrge qatysýshylardy qabyldaý jáne ornalastyrý, polıgonǵa aparatyn joldardyń jaı-kúıi, júrgizilgen qurylys jumystary men jıynǵa daıyndyq deńgeıi týraly baıandady.
Dáýren Qosanov dalalyq ınfraqurylym nysandaryn aralap, jazǵy amfıteatr qurylysynyń sapasyn, saptyq alańdy jáne áskerı-qoldanbaly ári sporttyq jarystar ótetin alańdardyń daıyndyǵyn baǵalady.
Sondaı-aq qorǵanys vedomstvosynyń basshysy qatysýshylardy, komanda jetekshilerin, sport nusqaýshylaryn jáne qazylar alqasynyń múshelerin ornalastyrý, tamaqtandyrý jáne turmystyq qamtamasyz etý máselelerine erekshe nazar aýdardy.
Jıynǵa qatysýshylardyń qaýipsiz ári jaıly ornalasýy úshin polıgonda ártúrli syıymdylyqtaǵy 74 shatyr ornatylǵan.
Jumys saparynyń qorytyndysy boıynsha mınıstr uıymdastyrýshylarǵa jıynǵa qatysýshylar úshin barynsha qolaıly jaǵdaı jasaýdy tapsyrdy.
– Turǵyn oryndardy sapaly jabdyqtaýdy, tolyqqandy tamaqtandyrýdy uıymdastyrýdy jáne shatyrly qalashyqta sanıtarlyq-gıgıenalyq talaptardyń saqtalýyn qamtamasyz etý qajet, – dedi Dáýren Qosanov.
Aıta keteıik, 21–27 maýsym aralyǵynda Býrabaı kýrorttyq aımaǵynda «Aıbyn» XII halyqaralyq áskerı-patrıottyq jastar jıyny ótedi. Oǵan Qazaqstanmen qatar Ázerbaıjan, Belarýs, Qyrǵyzstan, Reseı jáne Ózbekstan komandalary qatysady.
Aıta keteıik, 2025 jyly ótken «Aıbyn» halyqaralyq jıynyna júzdegen jas qatysyp, áskerı-qoldanbaly sport túrleri men patrıottyq baǵyttaǵy jarystarda baq synaǵan bolatyn.
Buǵan deıin Astanada «Aıbyn-2026» halyqaralyq jıynyna joldama alǵan komandalar anyqtalǵany habarlandy.
