Alty balasy bar otbasy Býrabaı taýlarynda adasyp ketti

ASTANA. KAZINFORM — Oqys oqıǵa Aqmola oblysy Býrabaı aýdanyndaǵy «Kókshetaý» mańynda bolǵan, dep habarlaıdy oblystyq TJD baspasóz qyzmeti.

— Búgin kúndiz Aqmola oblysy Býrabaı aýdanynda 7 adamnan onyń ishinde 6 baladan turatyn otbasy, teńiz deńgeıinen 920 metr bıiktikte ornalasqan taýdyń shyńyna kóterilip, túsý kezinde adasyp ketti, — delingen habarlamada.

Otbasy taýdan túsý kezinde birqatar qıyndyqqa tap boldy. Taýdyń tik eńis jerleri ózdiginen túsýge qaýipti boldy, sonymen qatar otbasy músheleri sharshap ketken.

Kómek týraly dabyl alǵan TJM qyzmetkerleri tez arada oqıǵa ornyna shyqty. Qutqarýshylardyń kásibıligi men jedel áreketteriniń arqasynda adamdar bıiktikten túsirildi. Medıtsınalyq kómekke eshkim muqtaj bolǵan joq.

Budan buryn Almaty oblysynyń taýlarynda týrısttiń adasqanyn jazǵanbyz.