Alty aıda Qazaqstanda 54 saýda úıi paıdalanýǵa berildi — Statbıýro

ASTANA. KAZINFORM — 2025 jyldyń qańtar–maýsym aılary aralyǵynda Qazaqstanda jalpy aýmaǵy 87,3 myń sharshy metrdi quraıtyn 54 saýda úıi paıdalanýǵa berildi. Bul týraly Ulttyq statıstıka bıýrosy málim etti.

Atalǵan nysandardyń naqty quny 39,7 mlrd teńgeni qurady.

Saýda úıleriniń eń kóp sany Shymkent qalasynda (15 nysan) jáne Qyzylorda oblysynda (14 nysan) tirkeldi.

Budan bólek, birinshi jartyjyldyqta jalpy aýmaǵy 39 myń sharshy metr bolatyn 60 sýpermarket iske qosyldy. Olardyń jalpy quny — 19,5 mlrd teńge. Sýpermarketterdiń basym bóligi Shymkent qalasynda (21 nysan), sondaı-aq Jambyl jáne Túrkistan oblystarynda — árqaısysynda 12 nysannan ashyldy.

Sondaı-aq, atalǵan kezeńde jalpy aýmaǵy 30,3 myń sharshy metrdi quraıtyn 176 mınımarket paıdalanýǵa berildi. Bul nysandardyń jalpy quny 11,2 mlrd teńge boldy.

Mınımarketterdiń eń kóbi Túrkistan (32), Jambyl (22) jáne Qyzylorda (20) oblystarynda ashyldy.

Buǵan deıin 2025 jylǵy alǵashqy alty aıda qurylys salasyndaǵy ósim 18,4%-ǵa jetkenin jazǵan bolatynbyz.