Alty aıda el ekonomıkasyna 9,5 trln teńge ınvestıtsııa salyndy
ASTANA.KAZINFORM – Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın ınvestıtsııalar el ekonomıkasynyń ósý draıveri bolyp otyrǵanyn málimdedi.
– Birinshi jartyjyldyqta negizgi kapıtalǵa salynǵan ınvestıtsııalar 9,5 trln teńgege jetip, 9,6%-ǵa ósti. Onyń ishinde jeke ınvestıtsııalar 21,4%-ǵa ulǵaıdy. Investıtsııalardyń neǵurlym kóp ósýi kelesi salalarda baıqalady: aqparat jáne baılanysta – 2,3 esege, qurylysta – 38,7%-ǵa, óńdeý ónerkásibinde – 33,3%-ǵa, aýyl sharýashylyǵynda – 24,6%-ǵa, kólik salasynda – 11,6%-ǵa. Investıtsııalardyń joǵary ósýi Ulytaý, Jambyl, Túrkistan, Abaı oblystarynda baıqalady. Negizgi kapıtalǵa salynǵan ınvestıtsııalardyń qurylymy ózgerip jatyr. Jeke ınvestıtsııalardyń úlesi 87% boldy, – dedi ol.
Aıta keteıik, buǵan deıin Úkimet hımııa ónerkásibindegi ınvestıtsııalyq jobalardy súıemeldeýdi kúsheıtetinin jazǵanbyz.
