Alty adam kóz jumǵan Pavlodardaǵy óndiristik apattyń sebebin arnaıy komıssııa anyqtaıdy
ASTANA. KAZINFORM – Úkimet basshylyǵynyń tapsyrmasymen oqıǵanyń sebepteri men mán-jaıyn anyqtaý úshin arnaıy komıssııa quryldy.
20 shilde kúni Pavlodar oblysynyń Aqtoǵaı aýdanyndaǵy «AQTOGAI MILK» JShS aýmaǵynda óndiristik jabdyqtarǵa qyzmet kórsetý jumystary kezinde jazataıym oqıǵa oryn alyp, saldarynan alty adam qaza tapty. Taǵy bir qyzmetker dárigerlerdiń baqylaýynda qajetti medıtsınalyq kómek alyp jatyr.
Úkimet basshylyǵynyń tapsyrmasymen oqıǵanyń sebepteri men mán-jaıyn anyqtaý úshin arnaıy komıssııa quryldy. Onyń quramyna eńbek jáne halyqty áleýmettik qorǵaý, tótenshe jaǵdaılar, ishki ister, densaýlyq saqtaý, ekologııa jáne tabıǵı resýrstar, aýyl sharýashylyǵy mınıstrlikteriniń, sondaı-aq Pavlodar oblysy ákimdiginiń ókilderi kirdi.
Komıssııaǵa oqıǵanyń barlyq mán-jaıyn jan-jaqty ári obektıvti zerdeleý, jazataıym oqıǵanyń sebepterin anyqtaý jáne mundaı jaǵdaılardyń qaıtalanýyna jol bermeý jóninde naqty sharalar ázirleý tapsyryldy.
— Qaza tapqandardyń otbasylaryna jáne zardap shekken azamatqa memlekettik organdar men jumys berýshi tarapynan qajetti qoldaý kórsetiledi. Jumys berýshi materıaldyq kómek kórsetýdi, qaza tapqan qyzmetkerlerdiń jalaqysy mólsherindegi tólemderdi aǵymdaǵy jyldyń sońyna deıin saqtaýdy, sondaı-aq olardyń nesıe mindettemelerin óteýdi óz moınyna aldy. Budan bólek, kompanııa qaza tapqan qyzmetkerlerdiń kámeletke tolmaǵan balalaryn kámelettik jasqa tolǵanǵa deıin asyraý men oqýyna baılanysty shyǵyndaryn tolyq ótemek, — delingen mınıstrlik habarlamasynda.
Eńbek jáne halyqty áleýmettik qorǵaý mınıstri Asqarbek Ertaev Pavlodar oblysyna baryp, oqıǵa ornyndaǵy jaǵdaımen tanysyp, óńir basshylyǵynyń, memlekettik organdar men quqyq qorǵaý organdary ókilderiniń qatysýymen úılestirý keńesin ótkizdi.
Mınıstr qaza tapqandardyń týystarymen de kezdesip, olarǵa kóńil aıtyp, memleket tarapynan barlyq qajetti qoldaý kórsetiletinin jetkizdi.
Qazirgi tańda Qylmystyq kodeksiniń 156-babynyń 4-bóligi boıynsha sotqa deıingi tergep-tekserý bastaldy.
Tergeý barysy Úkimet baqylaýynda bolady.
Eske salsaq Pavlodar oblysyndaǵy kásiporynda alty adam qaza tapqany týraly jazǵan edik.
