Altaıdyń arheologııalyq murasy alty qurlyqqa tanystyrylady
ASTANA. QazAqparat - Arheologııany damytýǵa arnalǵan óńirlik baǵdarlamanyń arqasynda Shyǵys Qazaqstanda sońǵy úsh jyldyń ishinde kóptegen jádigerler tabyldy. Endi sol qazyna álem mýzeılerine qoıylmaq, dep habarlaıdy QazAqparat tilshisi.
Atalmysh jaǵymdy jańalyqty oblys ákimi Danıal Ahmetov OKQ-da ótken brıfıngte aıtty. Ákimniń aıtýynsha, óńirde «Shyǵys Qazaqstannyń kóne qazynalary» atty joba daıyndalyp jatyr. Bul joba Zeınolla Samashev, Ábdesh Tóleýbaev bastaǵan arheologtarǵa Shilikti, Berel, Eleke sazy qorymdarynan tabylǵan jádigerlerdi álem nazaryna keń aýqymda usynýǵa múkindik beredi.
«Úsh jyldyq izdenistiń basty jetistigi - Tarbaǵataı aýdanynyń Eleke sazy jaılaýynan tabylǵan 17-18 jastaǵy «Altyn adam». Aqsúıek jigit bizdiń zamanymyzǵa deıingi VIII-VII ǵasyrlarda ómir súrse kerek. Oblys turǵyndary men qonaqtar bul jádigerlerdi Óskemende salynatyn «Arheologııa jáne qazirgi zaman óneri» mýzeıinen kóretin bolady», - dedi Danıal Ahmetov.
Oblys basshysynyń sózine sensek, qurylystyń jobalyq-smetalyq qujattary kelesi jyly daıyn bolmaq. Al álem nazaryn aýdarý úshin London, Máskeý, Qazan, Tashkent qalalarynda kóshpeli kórmeler uıymdastyrylatyn bolady. Elbasynyń «Uly dalanyń jeti qyry» maqalasynyń mańyzyn ataǵan Danıal Ahmetov osy baǵyttaǵy jumystar ári qaraı jalǵasatynyn málimdedi.
