Altaıdyń Kóktoǵaı aýdanynan asyl metaldardyń 15 túrli rýdasy tabyldy - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
7 balldyq jer silkinisinde operatsııany jalǵastyra berdi - «People.cn»
Qytaılyq dárigerler 7,1 balldyq jer silkinisi kezinde kúrdeli operatsııa jasaýdy jalǵastyra berdi, dep habarlaıdy «People.cn».
Qytaılyq BAQ-tyń keltirgen deregine súıensek, jer silkinisi bastalardan buryn, Shyńjańnyń Aral qalalyq aýrýhanasynda naýqastyń bas súıegin ashyp, mı hırýrgııasyn júrgizip jatqan. Beınebaqylaý kamerasyna túsken vıdeodan operatsııa bólmesindegi emdeý aspaptary jer silkingen kezde qozǵala bastaǵanyn kórýge bolady. Alaıda, hırýrg An Shýfanda, basqa kómekshileri de sabyrlylyqpen operatsııa jasaýdy jalǵastyra bergen. Operatsııa sátti oryndalyp shyqqan. Kúrdeli otadan keıin, naýqastyń jaǵdaıy turaqtalyp, qazir dárigerlerdiń baqylaýynda eken. Medıtsına qyzmetkerleriniń beınebaqylaý kamerasyna túsip qalǵan bul áreketi kópshilikti súısindirgen.
Aıta keteıik, 23 qańtar saǵat 2:09-da Shyńjańnyń Aqsý aımaǵyndaǵy Úshturpan aýdanynda 7,1 balldyq jer silkinisi bolǵan edi. Jer silkinisinen keıin keıbir aýdandarda elektr qýaty úzildi.
Tótenshe jaǵdaıdan keıin 12 myń adam qaýipsiz jerlerge evakýatsııalanǵan. Turǵyndar kóbine arnaıy turǵyzylǵan shatyrlarmen birge mektep jáne sport keshenderine ornalastyrylǵan. Jalpy Qytaıdaǵy jer silkinisinen 3 adam mert bolyp, taǵy 5 adam jaralanǵan.
Ózbekstan men Qazaqstan arasyndaǵy taýar aınalymy 4 mıllıard dollardan asty - «ÓzA»
Ózbekstan men Qazaqstan arasyndaǵy taýar aınalymynyń kólemi 4 mıllıard dollardan asty. Ótken jyldyń qorytyndysy boıynsha Qazaqstan Ózbekstannyń negizgi úsh syrtqy saýda áriptesteriniń biri boldy, dep jazady ózbekstandyq «ÓzA» aqparattyq agenttigi.
Atalǵan BAQ-málimetnshe, búginde Ózbekstan álemniń 198 elimen saýda-sattyq qarym-qatynas ornatqan. Ótken jyldyń qańtar-jeltoqsan aılarynda Ózbekstannyń syrtqy saýda aınalymy 62,6 mıllıard dollardy qurap, 2022 jyldyń sáıkes kezeńimen salystyrǵanda 23,9 paıyzǵa artqan. Jalpy kólemniń ishinde eksport 24 426,2 mıllıon dollardy, ımport 38 141 mıllıon dollardy qurady.
Aıta keteıik, Qytaı saýda seriktes elder qatarynda kósh bastap tur. Ózbekstanmen Qytaı arasyndaǵy taýar aınalymy 13,7 mlrd dollardy (jalpy kólemniń 21,9%) qurady. Bul kórsetkish boıynsha Reseı ekinshi orynda – 9,88 mlrd dollar (15,8%). Úzdik úshtikti Qazaqstan 4,39 mıllıard dollarmen (7%) qorytyndylaǵan.
Ózara saýda aıasynda Ózbekstan Qazaqstanǵa 1372,5 mıllıon dollardyń ónimin eksporttady. Al ımport 3026,4 mln dollardy qurady.
Altaıdyń Kóktoǵaı aýdanynan asyl metaldardyń 15 túrli rýdasy tabyldy – «Uukilialtay»
Geologtar Jońǵar oıpatynyń soltústik-shyǵys shetindegi kobalt metall resýrstaryn izdeýde jańa jetistikterge qol jetkizdi.
Qazirgi ýaqytta qytaılyq geologtar Kóktoǵaı aýdanyndaǵy Óndirqara mys, altyn, kobalt kenishinde bastapqyda 15 rýdalyq deneni, onyń ishinde 9 altyn rýdalyq korpýsyn jáne 6 mys, altyn, kobalt aralas rýdasyn tapqan, dep habarlaıdy «Uukilialtay» aqparattyq portaly.
Qytaılyq BAQ-tyń dereginshe, Kóktoǵaı okrýgi Altaı aımaǵynyń shyǵys shetinde ornalasqan. Geotektonıkalyq qurylymy Qazaqstan, Qytaı jáne Mońǵolııadaǵy álemdik deńgeıdegi tústi metaldardyń mıneraldaný beldeýiniń ortańǵy bóligindegi aýdan. Kóktoǵaı mıneraldaný geologııalyq jaǵdaılary joǵary, paıdaly qazbalarǵa baı aýdan sanalady.
Kóktoǵaı aýdanynda ken baılyǵy mol, tústi metaldar, sırek kezdesetin metaldar qory búkil el boıynsha aldyńǵy qatarda.
Atalǵan aýdannan qazirgi ýaqytta tórt negizgi paıdaly qazbalardyń 92 túri ashylǵan. Temir, mys, molıbden, qorǵasyn, myrysh jáne t.b. Jalpy asyl metaldar jaǵynan Kóktoǵaı Shyńjańda birinshi orynda turady.
Kóktoǵaıdan tabylǵan asa sırek kezdesetin magnıtti qatty metall retinde kobalttyń joǵary temperatýrada joǵary beriktigin saqtaı alady. Sondaı-aq, kobalt – elektr aspaptarynda, mashına jasaýda jáne basqa salalarda keńinen qoldanylady. Kobalt metalynyń resýrstary salystyrmaly túrde tapshy bolǵandyqtan, jańa energetıka jáne basqa da baılanysty salalardyń damýymen onyń naryqtyq suranysy ósýde jáne ony damytý men qoldaný perspektıvalary keń.
Aıta keteıik, Kóktoǵaı Altaı taýynyń shyǵys, joǵarǵy jaǵynda ornalasqandyqtan «Ór Altaı» óńiri dep te atalady. Sonymen qatar Kóktoǵaı uzaq ýaqyttan beri qazaqtar mekendep kele jatqan aýdannyń biri sanalady.
Ǵabıt Qoıshybaev Mońǵolııanyń SQ mınıstrliginiń Memlekettik hatshysymen kezdesti – «Kaznews»
QR-nyń Mońǵolııadaǵy Elshisi Ǵabıt Qoıshybaev Mońǵolııanyń Syrtqy qatynastar mınıstrliginiń Memlekettik hatshysy Nıamdorjıın Anhbaıarmen kezdesý ótkizdi, dep habarlaıdy mońǵolııalyq «Kaznews» aqparattyq portaly.
Atalǵan basylymnyń málimetinshe, kezdesý barysynda taraptar Qazaqstan men Mońǵolııa arasyndaǵy yntymaqtastyqtyń 2024 jylǵy kún tártibi boıynsha pikir almasty. Atap aıtqanda, olar aǵymdaǵy jyly josparlanǵan mańyzdy ekijaqty is-sharalar kestesin talqylady, eki eldiń yntymaqtastyǵynyń shart-quqyqtyq bazasyn odan ári jetildirý suraqtaryn qarastyrdy, syrtqy saıası vedomstvolardyń túrli baǵyttardaǵy ózara yqpaldastyǵyn, onyń ishinde konsýldyq saladaǵy ózara tıimdi árekettestikti odan ári nyǵaıtýǵa kelisti.
QazUÝ-ǵa Irannyń Mobadtar assotsıatsııasynyń prezıdenti keldi - «Parstoday»
24 qańtarda ál-Farabı atyndaǵy Qazaq Ulttyq ýnıversıteti shyǵystaný fakýltetine Irannyń Mobadtar assotsıatsııasynyń prezıdenti Mehraban Poladı myrza keldi.
Qurmetti qonaq shyǵystaný fakýltetimen tanysýǵa arnaıy kelip, Taıaý Shyǵys jáne Ońtústik Azııa kafedrasy oqytýshylarmen kezdesti. Kezdesý suraq-jaýap túrinde ótti. M. Poladı myrza oqytýshylardy qyzyqtyrǵan suraqtarǵa jaýap berdi, dep habarlaıdy «Parstoday» aqparat agenttigi.
Irandyq BAQ-tyń keltirgen málimetterine súıensek, jalpy, mártebeli meıman Qazaqstanǵa QR ǴJBM ǴK Fılosofııa, saıasattaný jáne dintaný ınstıtýty men Turan ýnıversıteti birigip ótkizetin «Eýrazııa kontınenti halyqtarynyń evolıýtsııasy kontekstindegi zoroastrızmniń mádenı-tarıhı murasy» taqyrybyndaǵy halyqaralyq konferentsııaǵa qatysý maqsatynda kelgen.
Bul konferentsııa 25 qańtarda Turan ýnıversıtetinde ótken.
Er adam 6-qabattan qulaǵan balany jerge túsirmeı qaǵyp alǵan - «Jenmın jıbao»
Qytaıdyń Fýjııan ólkesi Pýchyn aýdanynda er adam 6-shy qabattan qulaǵan balany jerge túsirmeı qaǵyp alǵan, dep habarlaıdy Qytaıdyń «Jenmın jıbao» aqparattyq portaly.
Atalǵan BAQ-tyń málimetinshe, Fýjııan ólkesi Pýchyn aýdany Iýıjın Hýafý shaǵyn aýdanynda 3 jastaǵy ul bala abaısyzda 6-shy qabattan qulap ketken. Osyndaı qaýipti sátte, joldan ótip bara jatqan Sýı Lııanhaı esimdi er adam balany jerge túsirmeı qaǵyp alǵan.
Baqylaý kamerasynan baıqalǵanyndaı, bala aldymen ekinshi qabattaǵy jarnama taqtasynyń ústine qulap túsken. Sýı bir jaǵynan telefon soǵyp tursa, endi bir jaǵynan qulap kele jatqan balany jerge túsirmeı qolymen ustap qalǵan.
«Asa qaýipty sátte, ol ómirine tóngen qaýipke qaramaı, qulaǵan balany qos qolymen qaǵyp alady. Der kezinde qutqarǵandyqtan, balanyń ómirine qaýip tónbegen, er adamda jaralanbaǵan», dep jazady qytaılyq BAQ.
Qazaq, Túrik elderiniń Aýyl sharýashylyǵynda yntymaqtastyq ornamaq – «TRT»
Túrkııa Respýblıkasy Aýyl sharýashylyǵy mınıstriniń orynbasary Ebýbekır Gızlıgıder bastaǵan túrik delegatsııasy men QR Aýyl sharýashylyǵy vıtse-mınıstri Ábilhaıyr Tamabek tuqym sharýashylyǵy jáne ırrıgatsııalyq júıeler máselelerin kóterdi. Kezdesý Astanada ótken.
Bul týraly osy aptada Túrkııa Radıo Televızııa portaly habarlady.
Uıymdastyrylǵan kezdesýler barysynda Qazaqstan men Túrkııa arasyndaǵy yntymaqtastyq pen birlesken jobalar talqylandy.
Túrkııalyq basylymnyń dereginshe, Túrik delegatsııasyna ekonomıkalyq ósý monıtorıngi jáne memlekettik baǵdarlamalardy oryndaý jónindegi quraldar jıyntyǵy bolyp tabylatyn «Smart Data Ukimet» jobasy tanystyryldy. Budan ári Túrkııadan kelgen áriptesterge «Qazaqstan Ǵarysh Sapary» tanystyrylyp, Qazaqstanda paıdalanylmaıtyn aýyl sharýashylyǵy jerleri qalaı anyqtalatyny, atap aıtqanda, jerdi ǵarysh qashyqtyǵynan zondtaý arqyly anyqtalatyny aıtyldy.
Ebýbekır Gızlıgıder Qazaqstannyń Aýyl sharýashylyǵy mınıstri Aıdarbek Saparovpen de kezdesip, tuqym sharýashylyǵy jáne ınvestıtsııa salasyndaǵy yntymaqtastyqty talqylady.
