Altaıdan Kaspııge deıin: nemis týroperatorlary eldegi tórt týrıstik baǵytpen tanysty
ASTANA. KAZINFORM - Germanııanyń týrıstik ındýstrııasynyń 60-tan astam ókili Qazaqstannyń birneshe óńirin aralap, eldiń týrıstik múmkindikterimen tanysty. Altaıdan Kaspıı jaǵalaýyna, Almatydan Túrkistanǵa deıin barǵan mamandar Qazaqstannyń nemis saıahatshylaryna qandaı baǵyttar usyna alatynyn jáne olardyń qaısysy Germanııa naryǵynda qyzyǵýshylyq týdyrýy múmkin ekenin saralady. Sapardan keıin týroperatorlar búgin Astanada ótken DRV Destination Forum aıasynda alǵan áseri men usynystaryn ortaǵa saldy.
Atalǵan forým Germanııanyń iri týrıstik qaýymdastyǵy Deutscher Reiseverband (DRV) jáne FVW medıatobynyń birlesken jobasy aıasynda Kazakh Tourism-niń qoldaýymen uıymdastyryldy. 20-24 tamyz kúnderi nemis delegatsııasy tórt baǵyt boıynsha týrlarǵa shyǵyp, Almaty men Almaty oblysyn, Mańǵystaý jáne Shyǵys Qazaqstan oblystaryn, sondaı-aq Shymkent pen Túrkistan óńirin aralady.
Qazaqstanǵa Germanııadan 65-ten astam týrızm ókili keldi
Saparǵa qatysýshylar birneshe topqa bólinip, elimizdiń ár óńirindegi týrıstik múmkindiktermen tanysty. FVW Medien bas redaktory Aleksandr Krýgtyń aıtýynsha, Qazaqstanǵa Germanııanyń týroperatorlary men týrıstik kompanııalarynyń 65-ten astam ókili kelgen.
— Búgingi forýmnyń ereksheligi — osy saparǵa qatysqan 65 adamnyń barlyǵy alǵan áserimen bólisip, sýretterin kórsetip, san qyrly, kórkem Qazaqstandy nemis týrısterine qalaı tıimdi tanystyrýǵa bolatyny jónindegi ıdeıalaryn ortaǵa salady, — dedi ol.
Osylaısha, nemis týrızm salasynyń mamandary Qazaqstandy syrttaı tanyp qana qoımaı, eldiń týrıstik áleýetin óz kózimen baǵalaýǵa múmkindik aldy. Olar kórikti jerlermen qatar, týrıstik baǵyttardyń qolaılylyǵyna, ınfraqurylymǵa jáne óńirlerdiń týrıst qabyldaý múmkindigine kásibı turǵydan nazar aýdardy.
— Sońǵy birneshe kúnniń ózinde biz ádemi áser aldyq. Eldiń tabıǵatyn, mádenıetin, dástúrin jaqynyraq tanyp, týrıstik múmkindikterin óz kózimizben kórdik. Qatysýshylardyń reaktsııasynan Qazaqstannyń olarǵa erekshe áser qaldyrǵanyn baıqaýǵa bolady. Biz kórgenimizdi Germanııadaǵy áriptesterimiz ben týrıstik naryqqa jetkizemiz, — dedi ol.
Qazaqstannyń qandaı erekshelikteri nazar aýdartty
DRV prezıdenti Albın Loıdl Qazaqstanǵa sapar barysynda nemis týrızm salasynyń ókilderine eldiń tabıǵatymen qatar, mádenıeti men sáýletin jaqynyraq tanýǵa múmkindik bolǵanyn aıtty. Onyń sózinshe, qatysýshylarǵa qazaqtyń dástúrli mádenıeti men sáýlet óneri erekshe áser qaldyrǵan.
— Bizdi sáýlet óneri men eldiń mádenıeti, sonyń ishinde Qoja Ahmet ıAsaýı kesenesi erekshe tańǵaldyrdy. Bul sapardyń taǵy bir ereksheligi — biz tek kórip, tamashalaǵan joqpyz, túrli is-sharaǵa ózimiz de belsene atsalystyq. Bul biz úshin óte qyzyqty tájirıbe boldy, — dedi ol.
Ol sapar baǵdarlamasynda Qazaqstannyń dástúrli mádenıetimen tanysýǵa arnalǵan sheberlik sabaqtary men basqa da túrli tájirıbelik sharalar uıymdastyrylǵanyn erekshe atap ótti. Onyń pikirinshe, mundaı tásil týrıstke eldi syrttaı baqylap qana qoımaı, onyń mádenıetin tikeleı sezinýge múmkindik bermek.
DRV prezıdenti Qazaqstannyń týrıstik áleýeti tek tabıǵaty men tarıhı-mádenı murasymen shektelmeıtinin atap ótti. Ol sapar barysynda kórsetilgen qonaqjaılyq pen baǵdarlamanyń uıymdastyrylýyna da joǵary baǵa berdi.
— Qazaqstanda bári tamasha uıymdastyrylǵan. Bizdi qarsy alǵan adamdardyń yqylasyn erekshe sezindik. Týrızmdi damytyp júrgen adamdardyń óz isine degen kózqarasyn da kórdik. Saparymyzdy uıymdastyrýǵa atsalysqan ári bizdi osylaı jyly qabyldaǵan jandarǵa alǵys aıtamyn, — dedi ol.
Budan bólek ol búgingi forýmnyń basty basty maqsaty burynnan bar baılanystardy nyǵaıtyp, Germanııadan kelgen mamandarmen qarym-qatynasty jandandyrý ekenin eske saldy.
Germanııadan keletin týrıster sany artyp keledi
Qazaqstan úshin endigi mańyzdy mindet — nemis týrıstik bıznesiniń qyzyǵýshylyǵyn naqty týrıstik baǵyttar men saıahatshylarǵa usynylatyn daıyn týrónimderge aınaldyrý.
QR Týrızm jáne sport vıtse-mınıstri Mıras Tólebaev Germanııa Qazaqstan úshin Eýropadaǵy strategııalyq mańyzy bar týrıstik naryqtardyń biri ekenin atap ótti. 2025 jyly elimizdegi qyzmet kórsetý oryndarynda Germanııadan kelgen shamamen 37 myń týrıske qyzmet kórsetilgen. Vedomstvo dereginshe, bul kórsetkish jyl saıyn 10-15 paıyzǵa ósip keledi.
Eki eldiń týrızm salasyndaǵy yntymaqtastyǵy buǵan deıin de birneshe baǵytta jalǵasyn tapqan. 2025 jyly Qazaqstan nemis týragenttikterine arnalǵan aqparattyq týr uıymdastyrdy. Naýryz aıynda týroperatorlar arasynda B2B-kezdesýler ótip, DRV-men yntymaqtastyq týraly memorandýmǵa qol qoıyldy.
— Búginde osy ýaǵdalastyqtyń naqty júzege asyp jatqanyn kórip otyrmyz, — dedi Mıras Tólebaev.
Qazirgi forýmǵa Qazaqstannyń ishki jáne syrtqy týrızmi salasynda jumys isteıtin 25-ten astam týroperatory qatysty. Sondaı-aq jetiden astam qonaqúı men úsh áýe kompanııasynyń ókilderi keldi.
Nemis týrısterin tartýǵa qandaı múmkindik bar
Qazaqstan Germanııa naryǵynda týrızmniń birneshe baǵytyn qatar damytýdy kózdep otyr. Olardyń qatarynda tabıǵı jáne ekologııalyq týrızm, taý baǵyttary, etnotýrızm, mádenı-tarıhı jáne gastronomııalyq saparlar men saýyqtyrý týrızmi bar.
Qazaqstan tarapy eldiń tabıǵı alýandyǵyn basty artyqshylyqtardyń biri retinde qarastyrady. Ulttyq parkter el aýmaǵynyń 10 paıyzdan astamyn alyp jatyr. Dala, taý jáne shóldi aımaqtardyń qatar kezdesýi mazmuny men baǵyty ártúrli týrıstik marshrýttar ázirleýge múmkindik beredi.
Alaıda týrıster sanyn arttyrý úshin kórikti oryndardyń bolýy jetkiliksiz. Qazaqstandaǵy saıahattardy sheteldik týrıst ońaı taýyp, tańdap, satyp ala alatyndaı etý de mańyzdy.
— Biz qazaqstandyq týrıstik ónimderdiń nemis tutynýshysyna tikeleı qoljetimdi bolýyna múddelimiz. Buǵan eki eldiń týroperatorlary arasyndaǵy tikeleı baılanysty keńeıtý jáne daıyn týrıstik ónimderdi birlesip ilgeriletý arqyly qol jetkizý kózdelip otyr, — dedi vıtse-mınıstr.
Endigi maqsat — Germanııadan týrıster sanyn arttyrý
Qazaqstan tarapynyń baǵalaýynsha, týrıstik aǵyndy ulǵaıtýǵa qajetti negizgi alǵysharttar bar. Máselen, qazir Qazaqstan men Germanııa arasynda vızasyz rejım qoldanylady. Germanııa azamattary elimizde 30 kúnge deıin vızasyz júre alady.
Eki el arasynda áýe qatynasy da jolǵa qoıylǵan. Germanııa Qazaqstanmen Astana, Almaty jáne Oral arqyly, sonyń ishinde Frankfýrt baǵytyndaǵy reıstermen baılanysqan.
— Munyń bári Germanııadan keletin týrıster sanyn arttyrýǵa múmkindik beredi. Endigi másele — Qazaqstannyń týrıstik áleýetin nemis saıahatshysyna túsinikti, qoljetimdi ári satyp alýǵa bolatyn naqty ónimge aınaldyrý, — dedi vıtse-mınıstr.
Nemis tarapy úshin bul sapar Qazaqstandy óz kózimen kórip, keıin ony Germanııa naryǵynda tanystyrýǵa qajetti tájirıbe men aqparat jınaýǵa múmkindik berdi.
Albın Loıdldyń aıtýynsha, forýmnyń negizgi maqsaty — Germanııanyń týrızm mamandaryna Qazaqstannyń san qyrly múmkindikterin kórsetý jáne alǵan áserdi nemis naryǵyna jetkizý.
Nemis týroperatorlarynyń Qazaqstan baǵyttaryn óz baǵdarlamalaryna qosyp, jańa marshrýttar men týrpaketter usynýy forýmnyń negizgi nátıjesine aınalýy múmkin. Mundaı týrıstik ónimderdiń Germanııa naryǵyna shyǵýy Qazaqstanǵa keletin saıahatshylar sanyn arttyrýǵa jol ashady. Osylaısha, Astanadaǵy forým eki el arasyndaǵy týrıstik baılanysty naqty jobalarǵa ulastyrýǵa múmkindik beredi.
Aıta keteıik, buǵan deıin týrızmdi memlekettik qoldaý boıynsha qandaı ózgeris engizilip jatyrǵany jóninde materıal jarııalandy.
