Altaıdan aýǵan el taǵdyry sahnalandy
Kórermenge jol tartqan tarıhı qoılym belgili tulǵa – Halıfa Altaı jáne jazýshy Hasan Oraltaıdyń shyǵarmalary negizinde sahnalanǵan Rejısseri – Farhat Moldaǵalı.
Qıyn-qystaý kezderdi bastan keshe júrip taǵdyrdyń san qıly aýyrtpalyǵyna moıymaı Altaıdan Anadolyǵa deıingi azapty jol, qaraly kóshte san-túrli taǵdyr keship, bozbala bop attanyp, Táýelsizdik alǵan týǵan eline aqsaqal bop oralǵan ultymyzdyń ardaqty azamaty Halıfa Altaı bas keıipkerdiń birine aınalǵan bul qoıylym qııamet qaıym kúnderdi, zulmat jyldardy ótkerse de, qazaq halqynyń adamdyqtan aınymaı, tektiligin joǵalpaǵany dini men dilin, dástúri men salt sanasyn berik ustanǵanyn sóz etedi.
1950-1960 jyldary Túrkııanyń bas mınıstrlik qyzmetin atqarǵan, belgili memleket qaıratkeri Adnan Menderestiń qazaq halqyna jasaǵan jaqsylyǵy men Anadoly jeriniń álemdegi barlyq túrikterdiń panasy bolǵany da qoıylymda kórinis tapqan.
Qoılym jas urpaq ókilderin otanshyldyqqa tárbıeleýde, patrıottyq rýhta baýlýda jáne týǵan jerdiń qadirin tereń túsinýge úndeýde Taklamakan shólinde, Gımalaı taýynda arpalyspen ótken ómir ótkelderinde ulttyq bolmysynan ajyramaǵan ata-babamyzdyń qandy tarıhyn kórkemdik shyndyq arqyly jetkize bilgen.
«Qazaq tarıhyndaǵy «azaly kósh», «qaraly kósh», «sońǵy kósh» syndy uǵymdarǵa aınalyp, qalammen emes, qanmen jazylǵan babalar keshken zulmat kúnder pesa bolyp, arnaıy sahnaǵa laıyqtalyp jazylmaǵandyqtan, qansha ýaqyt boıy tolǵatyp, teatr tilimen sóıleıtin kúnin kútip jatqanyn janymyz sezedi. «Altaıdan aýǵan el» atty spektakldi dúnıege ákelý barysynda biz sol tylsym kúshti, babalar rýhyn sezindik. Qoıylymǵa «janr» qoıýǵa da qınaldyq. «Keıipkerler» dep jazýǵa da júreksindik. Qoıylymdaǵy bir kóshte birneshe kóshtiń izi bar, bir keıipkerde birneshe adamnyń taǵdyry bar... Al bizdiń basty mindet – sol tarıhty, sol shyndyqty kórkem ónerdiń tilimen kórermen janyna jetkizý. Osy qoıylym – «elim» dep eńirep, erkindik úshin qurban bolǵan jan ıeleriniń basyna qoıǵan kók shubar tas, máńgilik eskertkish bolsyn!», - deıdi qoıylymnyń sahnalyq nusqasynyń avtory Mıras Ábil.
