Altaıdaǵy dástúrli qazaq emhanasy túngi emdeý qyzmetin engizdi — sheteldegi qazaq baspasózi

Ózbekstan men Qazaqstan arasyndaǵy týrıster aǵyny arta túspek — ÓzA 

Tamyry tereńge tartqan tarıhı-mádenı baılanystar men Uly Jibek joly boıyndaǵy ortaq órkenıet murasy eki eldi ejelden jaqyndastyryp keledi. Osy ózara yqpaldastyqty jańa deńgeıge kóterý maqsatynda Týrızm komıtetinde Qazaqstannyń «Air Astana» áýe kompanııasynyń ókilderimen kelissózder ótti, dep habarlaıdy «ÓzA» aqparat agenttigi.

Keltirilgen derekterge súıensek, kezdesýde eki el arasyndaǵy áýe qatynasyn keńeıtý, jańa baǵyttar ashý jáne qoldanystaǵy reıster sanyn kóbeıtý máseleleri qarastyryldy. Ózbekstanda týrızm ınfraqurylymyn jedel damytý, zamanaýı qonaqúıler, mádenı-oıyn-saýyq nysandary men kólik-logıstıkalyq múmkindikterdi keńeıtý baǵytynda atqarylyp jatqan jumystar týraly jan-jaqty aqparat berildi.

Atap aıtqanda, Ózbekstanǵa keletin sheteldik týrısterdiń eldiń mádenı-tarıhı murasyna, sonyń ishinde Samarqand, Buhara jáne Hıýa qalalaryna qyzyǵýshylyǵy artyp kele jatqany aıtyldy. Áýe reısteriniń kóbeıýi jańadan ashylyp jatqan týrıstik nysandarmen, zamanaýı mýzeı-kórme keshenderimen, qaıta jańǵyrtylǵan tarıhı ansambldermen jáne damyǵan týrıstik ınfraqurylymmen tanysýǵa keń múmkindik beredi.

Sondaı-aq osy aptada «ÓzA»-da «Ózbekstan men Qazaqstan arasyndaǵy ǵarysh salasyndaǵy yntymaqtastyq nyǵaıyp keledi» degen taqyryptaǵy aqparat jarııalandy. 

Atalǵan basylymnyń deregine súıensek, búgingi tańda Ózbekstan men Qazaqstan arasyndaǵy baılanystar qarqyndy damyp keledi. Sonyń qatarynda ǵarysh salasyndaǵy yntymaqtastyq odan ári nyǵaıa túsken.

Ózbekstandyq BAQ-tyń habarlaýynsha, agenttik ókilderi men Qazaqstan Respýblıkasynyń Ózbekstandaǵy Tótenshe jáne Ókiletti elshisi Beıbit Atamqulov arasynda kezdesý ótti.

Jıynda ekijaqty yntymaqtastyqtyń bolashaǵy jáne ǵarysh salasyndaǵy baılanysty odan ári damytý máseleleri talqylandy.

Sondaı-aq, «Ýzbekkosmos» agenttigi men Qazaqstan Respýblıkasynyń Jasandy ıntellekt jáne tsıfrlyq damý mınıstrligi janyndaǵy Aeroǵarysh komıteti arasyndaǵy áriptestikti kúsheıtý baǵytyndaǵy yntymaqtastyq qarastyryldy.

Kezdesý barysynda Baıqońyr ǵarysh aılaǵy aýmaǵynda týrızm baǵytyn damytý, sondaı-aq ǵaryshtyq bilim berý men kadr daıarlaý salasyndaǵy yntymaqtastyqty keńeıtý máseleleri de sóz boldy.

Shyńjańnyń Qorǵas avtomobıl joly ótkelinde «jyldam arna» iske qosyldy — «Halyq gazeti»

1 naýryzdan bastap Shyńjańnyń Qorǵas avtomobıl joly ótkelinde qurlyqtaǵy porttarǵa arnalǵan «eksporttyq taýar kólikteri úshin jyldam arna» iske qosyldy, dep habarlaıdy Qytaıdyń «Halyq gazeti».

Qytaılyq BAQ-tyń málimetinshe, negizinen eksportqa arnalǵan kólik júrgizýshilerine qyzmet kórsetýge arnalǵan bul jańa shara shekaradan ótýshilerdi tekserý tıimdiligin arttyrýǵa baǵyttalǵan.

Málimet boıynsha, Shyńjańnyń Qorǵas avtomobıl joly ótkelinde iske qosylǵan «jyldam arna» burynǵy «bir tereze» tekserý jolynyń negizinde jyldam tekserý qurylǵylarymen jabdyqtalyp, júrgizýshilerdiń «adam jumys isteıtin tereze» kezeginen «arna ishindegi ózindik tekserýge» aýysýyn júzege asyrdy.

Keltirilgen derekterge súıensek, Qorǵas — Qytaıdyń eń iri taýarlaryn eksporttaıtyn qurlyqtaǵy ótkel. Kún saıyn 1000-nan astam kólik Qorǵas beketi arqyly kedendik deklaratsııadan ótkennen keıin Qazaqstan, Ózbekstan jáne basqa elderge jóneltiledi. 2025 jyly Qorǵas ótkeli arqyly eksporttalǵan kólikter sany 450 myńǵa jetip, 2024 jylmen salystyrǵanda 6,9 paıyzǵa ósip, tarıhı rekord jańartty.

Shyńjańdyq stýdent Gınnestiń dúnıejúzilik rekordyn jańartty — Harajorga

Qashqar óńirindegi Qashqar ýnıversıtetiniń stýdenti Álı Musa bir mınýt ishinde jipten 188 ret qos aınalymmen sekirip, «bir mınýtta jipten qos aınalymmen sekirý» boıynsha Gınnestiń dúnıejúzilik rekordyn jańartty. Bul týraly Gınnestiń dúnıejúzilik rekordtar uıymynyń resmı tekserý platformasy habarlady, dep jazady qytaılyq Harajorga basylymy.

Atalǵan BAQ-tyń habarlaýynsha, Álı Musanyń kórsetkishi burynǵy rekordtan 4 retke joǵary.

Osy nátıjesi arqyly ol Shyńjań boıynsha «bir mınýtta jipten 188 ret qos aınalymmen sekirý» rekordyn tirketken alǵashqy rekord ıesi atandy. Sonymen qatar, ol aımaqta jipten sekirý boıynsha ekinshi ret Gınnes rekordyn ornatqan sportshy bolyp otyr.

Túrkııada jumyssyzdyq deńgeıi el tarıhyndaǵy eń tómen kórsetkishke jetti — TRT

Túrkııada jumyssyzdyq deńgeıi jeltoqsan aıynda 7,7%-ǵa deıin tómendep, el tarıhyndaǵy eń tómen kórsetkishke jetti. Bul ˗ 2005 jyldyń qańtarynan beri tirkelgen eń tómengi deńgeı.

Bul týraly osy aptada Túrkııa Radıo Televızııa portaly habarlady. 

Atalǵan BAQ keltirgen málimetterge súıensek, Túrkııa statıstıka ınstıtýty beısenbi kúni jarııalaǵan derekterge sáıkes, 15 jastan joǵary jastar arasyndaǵy jumyssyzdyq jeltoqsanda 286 myń adamǵa azaıyp, 2,73 mıllıonǵa deıin qysqarǵan.

Osy kezeńde jumyssyzdyq deńgeıi erler arasynda 6,3%, áıelder arasynda 10,5% bolǵan.

Sonymen qatar jumyspen qamtý da azaıdy. Jumyspen qamtylǵandar sany 42 myń adamǵa deıin qysqaryp, jalpy jumyspen qamtý kólemi 32,68 mıllıon adamǵa jetken.

Al jalpy jumyspen qamtý deńgeıi 49,1% tómendedi. Erler arasynda bul kórsetkish 66,8%, áıelder arasynda 32,7% bolǵan.

Eńbek kúshi de 328 myń adamǵa azaıyp, 35,42 mıllıonǵa deıin tómendedi, al eńbek kúshine qatysý deńgeıi 53,2% bolǵan.

Altaıdaǵy qazaq emshiligi shıpahanasy túngi emdeý qyzmetin engizdi — Altaı aqparaty

Altaı aımaqtyq juńı shıpahanasy (Qazaq emshiligi shıpahanasy) turǵyndardyń kúndiz dárigerge qaralýyna qolaısyzdyq týyndaıtynyn eskere otyryp, túngi dıagnostıka jáne emdeý qyzmetin qaıta iske qosty, dep habarlaıdy Altaı aqparatynyń tilshisi.

Atalǵan BAQ-tyń emhana málimetine silteme jasap habarlaýynsha, túngi qabyldaý dúısenbiden jumaǵa deıin saǵat 19:00–den 21:00–ge deıin júrgiziledi. Qala turǵyndary shıpahananyń jelidegi tirkeý qyzmeti arqyly aldyn ala jazyla alady nemese tirkeý terezesinen sol jerde nómir alyp qabyldaýǵa kire alady.

Aımaqtyq juńı shıpahanasy dırektorynyń orynbasary Mıhýa Nıhymetqyzynyń aıtýynsha, bul qyzmet turǵyndardyń medıtsınalyq kómekke degen suranysyn óteý maqsatynda uıymdastyrylǵan.

- Qyzmetkerler men turǵyndardyń kúndiz dárigerge qaralýǵa ýaqyty bolmaýy eskerilip, qabyldaý ýaqyty keshki mezgilge uzartyldy. Osy arqyly dástúrli emdeý ádisterin keńinen qoldanyp, halyqqa qolaıly ári sapaly medıtsınalyq qyzmet kórsetýge múmkindik jasadyq, — dedi ol.

Mekemeniń málimetinshe, keshki qabyldaý barysynda juńı dári jaǵý, tas qandaýyrmen piskilep emdeý, qulaq uıashyǵyn emdeý, lońqa qoıý, dárilik býlaý, aıaq ýqalaý jáne qummen emdeý sekildi onnan astam dástúrli emdeý ádisi qoldanylady.

Túngi dıagnostıka-emdeý aımaǵy bıyl 8 qańtarda iske qosylǵan. Bul qyzmet jumystan nemese oqýdan keıin turǵyndardyń bos ýaqytynda em qabyldaýyna múmkindik berip otyr.

Sondaı-aq osy aptada Altaı aqparaty basylymynda «Altaı sheberi aǵash oıý arqyly myńjyldyq shańǵy mádenıetin jańǵyrtyp júr» degen taqyryptaǵy aqparat jaryq kórgen bolatyn.

Qytaılyq BAQ-tyń dereginshe, «Shańǵy tebýdiń otany» jáne «Qytaıdyń qar astanasy» atanǵan Altaı qalasynda jergilikti sheberler muz-qar mádenıetin qolóner arqyly jańǵyrtyp keledi.

Altaı qalasy Balbaǵaı kentiniń qolónershisi, 45 jastaǵy Adal Asylbek aǵash oıý óneri arqyly ejelgi shańǵy mádenıetin beıneleıtin týyndylar jasap júr. Ol aǵashty qaǵaz, al pyshaqty qalam retinde paıdalanyp, buıymdarǵa Altaıdyń jartastaǵy sýretteri men qarly tabıǵat kórinisterin oıyp túsiredi.

- Aǵash oıý arqyly Altaıdyń ejelgi mádenıetin kórsetip, ony týrısterge tanytqym keledi. Dástúrli qolónerdi jastarǵa úıretý arqyly bul ónerdi jalǵastyrý mańyzdy, — deıdi sheber.

Adal Asylbek 2006 jyly Úrimjide qolóner úırenip, keıin týǵan jerine oralyp, dástúrli aǵash oıýdy zamanaýı stılmen ushtastyrdy. 2016 jyly ol týrıstik sývenırlerge arnalǵan jeke sheberhana ashty. Qazir onyń stýdııasy aǵash oıýdyń 50-den astam túrin jasap, «Adam shańǵysynyń shyǵý tegi» atty serııaly buıymdary týrıster arasynda tanymal bolyp otyr.

Sońǵy jyldary Altaı qalasy mádenı týrızmdi damytý maqsatynda aǵash oıý, ań terisinen shańǵy jasaý sekildi dástúrli kásipterdi qoldap keledi. Mundaı bastamalar kóne qolónerdi saqtaýmen qatar aýyldyq jerlerde tabys kózin qalyptastyrýǵa da yqpal etýde.

Osyǵan deıin 50 jylda Qytaıda bolǵan iri órt apattarǵa sholý jasadyq.