Altaıda qazaq emshiligine qatysty eki ǵylymı joba júldeli orynǵa ıe boldy - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
50 jyldan asqan avtokólikterdi paıdalanýǵa shekteý engiziledi – ÓzA
Ózbekstanda zaýyttan shyqqanyna 50 jyl jáne odan da kóp ýaqyt ótken avtokólik quraldaryn paıdalanýǵa tyıym salynady. Bul jóninde Mınıstrler Kabınetiniń «Jol qozǵalysy qaýipsizdigin qamtamasyz etý salasyn tsıfrlandyrý boıynsha qosymsha sharalar týraly» qaýlysy qabyldandy.
Bul týraly osy aptada «ÓzA» aqparat agenttigi habarlady.
Habarlamada aıtylǵandaı, qaýlyǵa sáıkes, Qoǵamdyq qaýipsizdik departamentine qarasty Jol qozǵalysy qaýipsizdigi qyzmetiniń aqparattyq júıesindegi «Ákimshilik is júrgizý» modýli jaýapty mınıstrlikter men vedomstvolardyń aqparattyq júıelerimen ıntegratsııalanady.
2026 jylǵy 1 aqpannan bastap jalpy salmaǵy (júkpen birge) 44 tonnadan asatyn júk avtokólikteri, ken oryndary, shahtalar men karerlerde paıdalanylatyn arnaıy tehnıka, zańdy tulǵalarǵa tıesili baǵytsyz taksıler, sondaı-aq «antıkvarlyq» avto-motokólikter úshin jeke serııaly memlekettik tirkeý nómir belgileri engiziledi.
Sonymen qatar óndirilgenine 50 jyl jáne odan da kóp ýaqyt ótken kólik quraldaryn paıdalanýǵa jáne qaıta tirkeýge tyıym salynyp, mundaı kólikter memlekettik tirkeýden shyǵarylady. Bul talaptar jol qozǵalysy qaýipsizdigin arttyrýǵa jáne tehnıkalyq turǵydan eskirgen kólikterdiń sanyn azaıtýǵa baǵyttalǵan.
Sondaı-aq osy aptada «ÓzA»-da «Alkogol jáne temeki ónimderin satyp alý tolyqtaı elektrondy tólem júıesine kóshedi» degen taqyryptaǵy aqparat jarııalandy.
Atalǵan BAQ-tyń málimetinshe, Ózbekstanda 2026 jyldyń 1 sáýirinen bastap alkogol jáne temeki ónimderin satyp alý tolyqtaı elektrondy tólem júıesine ótedi. Tólemdi bank kartasy, elektrondy tólem qosymshalary nemese QR-kod arqyly júrgizýge bolady.
Bul jańashyldyq tutynýshylar úshin satyp alý úderisin anaǵurlym yńǵaıly ári jedel etedi. Eń bastysy, saýda-sattyqtyń ashyqtyǵy men aıqyndyǵy qamtamasyz etilip, zańbuzýshylyqtardyń aldyn alýǵa múmkindik beredi.
Altaı qysqy oıyndarynyń III týrynda qandasymyz chempıon atandy - Altaı aqparat ortalyǵy
2026 jylǵy 3-shi «Muz ben qar Jibek joly, Qytaıdyń qar astanasy» atty Altaı taýynyń qysqy oıyndary 27 qańtarda Shyńjańnyń Altaı qalasynyń maýsymdyq dene shynyqtyrý saıabaǵynda bastaldy.
Tórt kúndik jarysqa Qytaı, Qazaqstan, Mońǵolııa jáne basqa da elder men aımaqtardan 200-den astam sportshy men jattyqtyrýshy qatysty. Qatysýshylar úsh negizgi sanat boıynsha 16 jarys túrinde baq synady: shańǵy jarysy, shańǵymen taýǵa shyǵý jáne konkımen syrǵanaý, dep habarlaıdy qytaılyq «Altaı aqparat ortalyǵy».
Atalǵan BAQ-tyń dereginshe, Altaı qalasynda halyqaralyq deńgeıde ótip jatqan 3-kezekti Altaı taýy óńirlik qysqy sport jarysynda Altaı aımaǵy ýákilder úıirmesiniń sportshylary joǵary nátıje kórsetip, úsh birdeı altyn medal ıelendi.
Altaı qalasynyń maýsymdyq dene shynyqtyrý saıabaǵynda ótken muzda jyldam syrǵanaý básekesinde erler men áıelder arasyndaǵy 1000 metr qashyqtyqta, sondaı-aq aralas estafetalyq jarysta altaılyq sportshylar top jardy.
Atap aıtqanda, erler arasynda A tobynyń 1000 metrlik jarysynda Altaı aımaǵy ýákilder úıirmesiniń sportshysy Han Iýıshýan jeńis tuǵyrynan kórindi. Al áıelder arasyndaǵy osy qashyqtyqta Altaı aımaǵynyń ókili Tańnur Azatqyzy qarsylastarynan ozyp, altyn medalǵa qol jetkizdi.
Sonymen qatar A toby boıynsha aralas estafetalyq syrǵanaý jarysynda Altaı aımaǵy ýákilder úıirmesi úılesimdi komandalyq jumystyń nátıjesinde taǵy bir altyn medal enshilegen.
Sondaı-aq osy aptada «Altaı aqparat ortalyǵy» basylymynda «Altaıda qazaq emshiligine qatysty eki ǵylymı joba júldeli boldy» degen mazmundaǵy aqparat jarııalandy.
Jaqynda 8-shy kezekti Shyńjań medıtsına ǵylym-tehnıka syılyǵynyń qorytyndysy jarııalanyp, Altaı aımaǵynan usynylǵan qazaq emshiligine qatysty eki joba júldeli oryndarǵa ıe boldy. Bul jetistikter óńirdegi dástúrli medıtsınanyń ǵylymı turǵyda damyp kele jatqanyn kórsetti, dep habarlaıdy altxw.com.
Atalǵan basylymnyń dereginshe, Shyńjań ólkelik dári-dármek zertteý ınstıtýty, Altaı aımaqtyq dástúrli qytaı medıtsınasy aýrýhanasy men qazaq medıtsınasy aýrýhanasy sondaı-aq Hanchjoý medıtsına kolledji birlesip iske asyrǵan «Qazaqsha dárilerden júıeli jańalyq ashý jáne úlgilik zertteý» atty jobasy birinshi dárejeli syılyqqa ıe boldy. Al «Qazaq dárilik ósimdikter shejiresi» (II tom) ekinshi dárejeli syılyqpen marapattaldy.
Atalǵan jobalar Altaı óńirindegi qazaqtyń dástúrli emshiligi men dárilerin júıeleý, ǵylymı negizdeý jáne klınıkalyq qoldanysqa engizý baǵytynda mańyzdy ról atqardy. Bul eńbekter dástúrli medıtsınany saqtap qana qoımaı, ony zamanaýı talaptarǵa saı damytýǵa jol ashty.
Júldeli jobalar Altaı aımaǵynyń qazaq emshiligi salasyndaǵy ǵylymı áleýetin aıqyndap, óńirlik medıtsına isiniń sapaly damýyna tyń serpin berdi.
Iran farmatsevtıka salasynda joǵary áleýetke ıe - «Eurasia Today» aqparat agentti
Farmatsevtıka salasynda joǵary áleýetke ıe Iran ishki naryqtyń basym bóligin otandyq óndiris esebinen qamtamasyz etedi, dep habarlaıdy EurasiaToday.
Atalǵan basylymnyń málimeti boıynsha, farmatsevtıka ónerkásibi — bul jaı ǵana bıznes emes, zamanaýı densaýlyq saqtaý salasynyń irgetasy ári memleket qýatynyń basty kórsetkishi. Bul sektor adam ómirin uzartýǵa, halyq saýlyǵyn jaqsartýǵa jáne ozyq ǵylymdy ilgeriletýge baǵyttalǵan kompanııalardy biriktiredi.
Halyqaralyq sanktsııalar salynǵan Iran úshin dári-dármekpen ózin-ózi qamtamasyz etý – jaı ǵana uran emes, ómirlik qajettilik. Sondyqtan Iran óz ishki múmkindikterine súıenip, ýnıversıtetterdiń ǵylymı áleýetin, mamandardyń tájirıbesin paıdalanyp, irgeli ǵylymǵa negizdelgen kompanııalardy damytyp keledi.
Tıantszın Astanadaǵy LRT-ge dıspetcherlik mamandar daıyndady – «Halyq gazeti»
Jaqynda Qazaqstandaǵy Astana jeńil relisti temirjolyna(LRT) dıspetcherlik qyzmet kórsetýge mamandanǵan taǵylymdamadan ótýshiler Tıantszındegi negizgi praktıkalyq oqý kezeńine jetti.
Bul týraly osy aptada Qytaıdyń «Halyq gazeti» basylymy habarlady.
Atalǵan BAQ-tyń dereginshe, joǵary bilikti dıspetcherlik jumys kúshin tárbıeleý úshin Tıantszın temirjol tranzıt toby negizgi dıspetcherlik daǵdylarǵa basa nazar aýdarady jáne naqty orynda oqytý, modeldengen oqytý túri jáne jumys tájirıbesin qamtıtyn úsh deńgeıli oqytý júıesin muqııat ázirledi. Astananyń asa sýyq klımaty men jeńil relisti temirjoldyń avtomatty júrýin eskerip, taǵylymdamadan ótýshilerge qytaılyq standartty dıspetcherlik tehnıka men praktıkalyq sharalardy meńgerýge kómektesetin arnaıy kýrstar usynyldy.
Sonymen qatar osy aptada «Halyq gazeti» basylymynda «Air Astana» áýe kompanııasy Almaty – Shanhaı baǵyty boıynsha turaqty reısterdi iske qosady» degen aqparat jaryq kórdi.
Qytaılyq BAQ-tyń Qazaqstan Respýblıkasy Kólik mınıstrligine silteme jasap habarlaýynsha, 2026 jyldyń 29 naýryzynan bastap «Air Astana» áýe kompanııasy Almaty – Shanhaı baǵyty boıynsha turaqty reısterdi iske qosady.
Habarda aıtylǵandaı, Reıster aptasyna 3 ret oryndalady. Nátıjesinde Qytaı men Qazaqstan arasyndaǵy reısterdiń jalpy sany aptasyna 81-den 84-ke deıin artady.
Málimetke sáıkes, reısterdiń ashylýy eki el arasyndaǵy saýda-ekonomıkalyq, iskerlik jáne týrıstik yntymaqtastyqtyń odan ári damýyna yqpal etedi dep josparlanyp otyr.
Elektrli kólikter alǵash ret benzındi kólikterden kóp satyldy - TRT
Belgisizdik pen artyp jatqan básekelestik jaǵdaıynda Eýropada elektrli kólikterdi qoldanysqa engizý protsesi qarqyn aldy. «Tesla» kompanııasy «BYD» jáne «Volkswagen» sııaqty básekelesteri aldynda naryqtaǵy úlesinen aırylyp barady.
Málimetterge sáıkes, saıasatkerler emıssııa erejelerin jeńildetýdi usynǵan kezeńniń ózinde Eýropa Odaǵynda jeltoqsan aıynda tolyqtaı elektrli avtokólikterdiń satylymy alǵash ret benzındi kólikterdiń satylymynan basyp ozdy, dep jazady Túrkııa Radıo Televızııa portaly.
Atalǵan BAQ-tyń keltirgen málimetterine súıensek, eýropalyq avtokólik lobbıi «ACEA» seısenbi kúni jarııalaǵan derekterge qaraǵanda, AQSh-ta ornalasqan «Tesla» kompanııasy qytaılyq «BYD» jáne «Volkswagen» sııaqty básekelesterine naryqtaǵy úlesin berip qoıdy.
«TRT»-nyń dereginshe, búkil Eýropa boıynsha avtokólik satylymy qatarynan altynshy aı boıy jyldyq negizde ósýin jalǵastyrdy. Tirkeý málimeti boıynsha, 2025 jyly Eýropada elektrli kólikterge tapsyrys berý sońǵy bes jyldaǵy eń joǵary deńgeıge jetti. Alaıda satylym kólemi pandemııaǵa deıingi deńgeıden áli de edáýir tómen.
Sondaı-aq Eýropanyń avtokólik sektory Qytaıdan kelgen básekelestik, AQSh-tyń ımporttyq tarıfteri jáne ishki naryqta elektrli kólikterge kóshýdi tıimdi júzege asyrý sııaqty qıyndyqtarǵa tap boldy.