Altaıda 70 birqazannyń basyn tasymaldaǵan azamat sottaldy
ASTANA. QazAqparat - Qazaqstan azamaty «Mersedes» kóligimen keptirilgen qus basyn tasymaldaǵany úshin sottaldy. Ol júkti Altaı arqyly Mońǵolııaǵa satý úshin apara jatqanyn moıyndady, dep habarlady Taıga.ınfo.
Batys Sibir kólik prokýratýrasynyń derekterine súıensek, er adam 70 keptirilgen birqazannyń basyn satyp alǵan. Taýardy Reseıge aparý úshin ol qus bastary salynǵan úsh sómkeni óziniń tanysynyń kóligine jasyrǵan. Kontrabandashy shekaradan ótpek bolǵanda ustaldy. Taýar quny 6,8 mln rýblge baǵalandy.
Aldyn ala tergeý barysynda fıgýrant aıybyn tolyqtaı moıyndap, ókinish bildirdi. Ol qustyń bastaryn Taýly Altaı arqyly Mońǵolııaǵa alyp ótpek bolǵanyn aıtty.
Sot oǵan bir jarym jyl synaq merzimimen shartty túrde úsh jylǵa bas bostandyǵynan aıyrý jazasyn kesti.
