Altaı taýynda jerlengen kóshpeli túrki áıeldiń qabiri tabyldy (FOTO)
Tabylǵan jádigerlermen mońǵol ǵalymdary, Hovd aımaǵy murajaıynyń qyzmetkerleri jumys isteýde. Murajaıdyń ǵylymı qyzmetkeri B. Súhbaatardyń aıtýynsha, olar Mońǵolııa aýmaǵynda, bálkim kúlli Orta Azııada alǵashqy ret tonalmaǵan sol kúıinde saqtalǵan túrkilerge tıesili qabir tapty.
Biregeı jádigerge álemniń túrli elinen mamandar qyzyǵýshylyq tanyta bastady.
Aldyn ala baǵalaý boıynsha, bul Altaı aýmaǵynda 1500 jyl buryn tirshilik etken túrki tildi taıpalardyń biriniń ókili - áıeldiń súıegi bolýy múmkin. Múrde kıizben birneshe qabattap oralǵan. Jynysyn anyqtaý úshin mamandar búldirmeı, kıizdiń oraýyn jazýy kerek.
«Mola qarapaıym áıelge tıesili. Bul áıel dep oılaımyz, sebebi er adam ádette, jaýynger retinde sadaqpen birge jerlenedi», - dedi Súhbaatar.
Súıektiń janynan ǵalymdar at qańqasyn, jaqsy saqtalǵan ertoqym, júgen, qoıdyń basy, jastyq, sazdan jasalǵan ydys, shómish, temir baqyrash, kóshpendi áıelge qajetti zat-múlikter jáne t.b. tapty.
Qabirdiń 2 803 metr taý bıiginde ornalasýy ony tonalýdan qorǵap kelgen, al deneniń mýmııaǵa aınalyp ári jádigerlerdiń búlinbeı saqtalýyna taýly salqyn klımat yqpal etken.
