Altaı ólkesinde apatqa ushyraǵan qazaqstandyq avtobýs 6 kúnnen beri trassada tur
ÓSKEMEN. QazAqparat - 8 qarashada jol apatyna ushyraǵan Óskemen-Barnaýl baǵytyndaǵy jolaýshylar avtobýsy alty kúnnen beri saraptama nátıjesin kútip, trassada tur, dep habarlaıdy «QazAqparat» HAA tilshisi.
Altaılyq BAQ-tyń habarlaýynsha, 8 qarasha kúni tańerteń A-322 «Barnaýl-Rýbtsovsk-Qazaqstan Respýblıkasynyń shekarasy» tasjolynyń 106-ynshy shaqyrymynda jan túrshigerlik jol apaty bolyp, «Toıota» avtomobıliniń tórt jolaýshysy qaza tapqan. Olardyń barlyǵy da áskerı qyzmetshiler bolǵan. Al «Renonyń» úsh jolaýshysy aýrýhanaǵa jetkizilgen.
Qazaqstandyq avtobýstyń ishindegi jolaýshylar zardap shekpegen. Topchıha eldi mekeniniń mańyndaǵy kópir janynda «Toıota» júrgizýshisi kólikke ıe bola almaı qalyp, qarama-qarsy baǵytqa shyǵyp ketedi de, jol jıegindegi qorshaýǵa soǵylady. Onyń artynan qazaqstandyq «Foton» avtobýsy, keıin «Reno» kelip soqtyǵysady.
«QazAqparat» HAA tilshisi oqıǵanyń mán-jaıyn anyqtaý úshin eki eldiń polıtsııa qyzmetine, sondaı-aq Shyǵys Qazaqstan oblysy boıynsha Tótenshe jaǵdaılar departamenti men Óskemen avtovokzalynyń ákimshiligine habarlasty. «Aıtylyp jatqan áńgimeler (áleýmettik jelilerde - red. tym ásirelengen. Shyn máninde, jaǵdaı múldem basqa. Birinshiden, avtobýs jolaýshylary apattan keıin 20 mınýttan soń, Barnaýlǵa tegin jetkizildi», - deıdi Óskemen avtovokzaly basshysynyń orynbasary Ivan Evdokımov.
Onyń sózine qaraǵanda, kórshi el áskerı prokýratýrasynyń tergeý organdary saraptamany aldaǵy juma kúni, 17 qarashada aıaqtaýǵa ýáde bergen. «Jol apatyna ushyraǵan qazaqstandyq avtobýstyń júrgizýshileri Topchıha eldi mekenindegi qonaqúıde jatyr. Avtobýsqa qajetti bólshekter jetkizilgen», - deıdi I. Evdokımov.
Anyqtalǵandaı, qaza tapqan áskerı qyzmetshiler 22, 23, 24 jáne bireýi 31 jasta bolǵan.
