Altaı Kólginov jańbyr sýymen qalaı kúresetinin aıtty
NUR-SULTAN. QazAqparat – Nur-Sultan qalasynyń ákimi Altaı Kólginov qala kóshelerine jańbyr sýynyń jınalyp qalý problemasymen qalaı kúresetindigin aıtty, dep habarlaıdy QazAqparat tilshisi.
«Áriptesterimiz jobalyq-smetalyq qujatyn jasady. Endi ony júzege asyratyn ýaqyt jetti. Qujatty daıyndaldy, jobalyq sheshim qabyldandy. Eki joba boıynsha baıqaý jarııaladyq. Birinshisi, Baýyrjan Momyshuly kóshesi boıynsha qazir konkýrstyq rásim ótip jatyr. Jeńimpazdy anyqtaý kerek, zań talaby bar. Imanov kóshesi boıynsha baıqaý aıaqtalyp, merdiger anyqtaldy. Bul úlken joba. Shamamen 2-3 jylǵa eseptelingen. Jumys bıyl bastaldy», - dedi qala basshysy elorda ákimdiginde ótken jıynnan keıin BAQ ókilderine bergen suhbatynda.
Onyń atap ótýinshe, jańbyr sýy jıi jınalyp qalatyn kelesi problemaly ýchaske Turan kóshesi sanalady. Bul kóshege qatysty jumystar da bastalyp otyr.
«Qazir biz ınfraqurylymdy talapqa sáıkestendirýimiz qajet. Ol jerlerde káriz kollektrlary bar. Bul tehnıkalyq máseleler bolǵanymen jumys júrgizilip jatyr. Degenmen, atalǵan úsheýinen bólek 32 núkte bar. Biz olarmen de jumys júrgizýimiz kerek. Ol bolashaqtyń enshisinde», - dedi Altaı Kólginov.
