Altaı Kólginov «Jaǵalaý 3,4» jáne «Shyǵys» turǵyn úı keshenderiniń úleskerlerimen kezdesti
NUR-SULTAN. QazAqparat - Elorda ákimi taǵy da úlestik qurylys nysandarynyń qurylys alańdaryn tekserip, olardyń úleskerlerimen áńgimelesti, dep habarlaıdy QazAqparat elorda ákimdiginiń baspasóz qyzmetine silteme jasap.
Baspasóz málimetterine qaraǵanda, Altaı Kólginov «Jaǵalaý-3» TK (A-J bloktary), Syǵanaq kóshesi, Qorǵaljyn tas jolynyń ońtústigine qaraı ornalasqan «Jaǵalaý-4» TK qurylysy ornynda boldy. Sondaı-aq ol Turan dańǵylynyń batysyna qaraı Syǵanaq kóshesi (jobalanatyn) boıynda salynyp jatqan «Shyǵys» TK máselelerimen tanysty. Bul turǵyn úılerde 1500-den astam úlesker óz páterlerin kútýde.
Kezdesý barysynda olar qurylystyń sozylýyna qatysty narazylyqtaryn bildirdi. Úleskerlermen áńgimelese kele, ákim óz tarapynan ákimdik nysandardy tapsyrýdyń bekitilgen merzimi oryndalýy úshin barlyq sharalardy qoldanatynyn atap ótti. Sonymen qatar, ol qurylys salýshylar óz qarajatyn úılerge salǵan adamdardyń senimin aqtamaǵanyn, olar uzaq jyldar boıy qurylysy aıaqtalmaǵan, sondaı-aq kóptegen kemshilikter bar ekenin atap ótti.
«Qurylysty salýshylar úleskerlerdiń aqshasyn paıdalana otyryp, úı salý mindetin óz moınyna aldy, biraq adamdardyń senimin aqtamady. Mundaı teris pıǵyldy adamdarmen aldaǵy ýaqytta jumys istemeıtin bolamyz. Endi atalmysh máseleni óz kúshimizben jetkizemiz. Eń bastysy qurylys jumystaryn júrgizý úshin memleket qarajaty bólindi. Qurylysty aıaqtaý jáne úleskerlerdiń uzaqqa sozylǵan máselelerin túpkilikti sheshý protsesin baqylaýda ustaımyz», - dedi ákim.
