Altaı Kólginov úzdik KTA komandasyn marapattady
NUR-SULTAN. QazAqparat -Elorda kúni qarsańynda Nur-Sultanda qazaqstandyq Kóńildiler jáne tapqyrlar alańynyń Jazǵy festıvali ótti, dep habarlaıdy QazAqparat ákimdiktiń baspasóz qyzmetine silteme jasap.
Ázilkeshter Esil ózeniniń jaǵasyndaǵy Amfıteatrda óner kórsetti. Sharaǵa shahar basshysy Altaı Kólginov te keldi. Bas qalanyń ákimi «Nur-Sultan qalasynyń kýbogyn» jáne 1 mln teńge mólsherindegi aqshalaı syılyqty festıvalde jeńimpaz atanǵan Arys qalasynyń komandasyna tabystady.
«Mundaı aıtýly sharalardy Jastar jylynda ótkizý óte mańyzdy. Qıyndyqtarǵa qaramastan Arys qalasynyń komandasy KTA festıvaline kelip, óz qalasynyń namysyn qorǵady. Biz sizderdi maqtan etemiz», - dedi elorda basshysy Altaı Kólginov.
Shara barysynda 10 komanda kórermender aldynda óner kórsetti. Atap aıtqanda, Almaty jáne Aqtóbe qalalarynyń quramalary, sondaı-aq, Qaraǵandy, Almaty, Túrkistan (Arys q.), Qyzylorda, Jambyl, Atyraý, Batys Qazaqstan oblystarynyń komandalary qatysty. Qazaqstandyq estrada juldyzdarynyń qurama komandasy kórermender úshin tosyn syı boldy. Oǵan Erke Esmahan, Ábdijappar Álqoja, Jasulan Bazarbaev, «Ázil álemi» teatrynyń akteri Qanat Áljapbarov pen «Óner qyrandary» teatrynyń akteri Janbolat Naızabekov engen.
Tanymal qoǵam qaıratkerleri, artıster men jýrnalıster ázilkeshterdiń ónerin baǵalady. KTA festıvaliniń qazylar alqasynyń quramyna elordanyń Mádenıet jáne sport basqarmasynyń basshysy Bolat Majaǵulov, Májilis depýtaty Bekbolat Tileýhan, aıtysker Aınur Tursynbaeva, Marjan Arapbaeva jáne júrgizýshi Nartaı Aralbaıuly kirdi.
KTA - oıyn-saýyq dýmanynyń jańa formaty jáne qazaqstandyq jastar óz talanttaryn pash ete alatyn biregeı alań. Joba avtory jáne júrgizýshisi - belgili otandyq ázilkesh Tursynbek Qabatov. «Kóńildi tapqyrlar alańy» 4 jyldan beri óz kórermenderine kúlki syılap keledi, onyń qanatynyń astynda elimizdiń úzdik jastar KVN komandalary óner kórsetedi. Qazaqstandyq oıy júırik KTA-ǵa qatysýshylar kúndelikti ómirden alǵan óz qaljyńdarymen kópshilikti tánti etedi.
