Altaı Kólginov para alǵan aýdan ákimi úshin otstavkaǵa kete me

NUR-SULTAN. QazAqparat – Elorda ákimi Altaı Kólginov ózine tikeleı baǵynyshty aýdan ákimi Asqar Esilovtiń jemqorlyq qylmysy úshin otstavkaǵa ótinish berýge mindetti emes. Bul týraly QR Memlekettik qyzmet isteri agenttigi Memlekettik qyzmet salasyndaǵy baqylaý departamentiniń dırektory Erlan Saparov aıtty, dep habarlaıdy QazAqparat tilshisi.

«Ol ýaqytta qala ákiminiń otsavkaǵa ketýin kózdeıtin zańdaǵy ózgerister qoldanysqa engizilmegen bolatyn. Sondyqtan bul tetik elorda ákiminiń otstavkaǵa ótinish berýi úshin qoldanylmaıdy dep sanaımyz», - dedi Erlan Saparov.

Aıta keteıik, «QR memlekettik qyzmeti týraly» Zańnyń memlekettik qyzmetshilerdiń jaýaptylyǵy máselesi boıynsha erejeleri 2019 jyldyń 10 jeltoqsanynda qoldanysqa engizilgen. Oǵan sáıkes, oblys, respýblıkalyq mańyzy bar qala nemese astana ákimderi óziniń orynbasary, ózine tikeleı baǵynyshty memlekettik saıası qyzmetshi, apparat basshysy ne aýdan (oblystyq mańyzy bar qala), qaladaǵy aýdan ákimi sybaılas jemqorlyq qylmys jasaǵan kezde otstavkaǵa ótinish berýi tıis.

Al 2020 jyldyń 17 aqpanynda Esil aýdany №2 aýdandyq sotynyń úkimimen Nur-Sultan qalasy «Baıqońyr» aýdanynyń burynǵy ákimi A.Esilov 515 000 teńge turatyn uıaly telefon túrinde para alǵany jáne fýtbol alańdarynyń qurylysy boıynsha qosalqy merdigerlik jumystardy alýǵa járdem bergeni úshin (QK 366-babynyń 2-bóligi) kináli dep tanyldy.