Altaı Kólginov ózi jaıly taraǵan aqparatty joqqa shyǵardy

ASTANA. QazAqparat – QR Premer-Mınıstriniń orynbasary Altaı Kólginov elorda ákimi bolǵan kezde kópbalaly analarmen bir-aq ret kezdesti degen aqparat shyndyqqa janaspaıtynyn aıtty, dep habarlaıdy QazAqparat tilshisi.

Búgin QR Ǵylym jáne joǵary bilim mınıstrliginiń keńeıtilgen alqa májilisinen keıin BAQ ókilderi Úkimet basshysynyń orynbasarynan: «BAQ-ta taraǵan málimetke sáıkes, siz Astana qalasynyń ákimi bolǵanda kópbalaly analarmen bir-aq ret kezdesipsiz. Qazir siz Premer-Mınıstrdiń orynbasary boldyńyz, áleýmettik salaǵa jaýap beresiz. Endi kópbalaly analardyń máselesin sheshýge arnalǵan arnaıy josparyńyz bar ma?» dep surady.

«Jalǵan aqparat taratpańyz. Bir-aq ret kezdesti degen aqparat shyndyqqa janaspaıdy. Men 3,5 jyldyń ishinde jyl saıyn birneshe myń adammen kezdestim. Sizge ákimshilikten naqty sandy alyp bereıin. Eń bastysy, biz Prezıdenttiń «Halyq únine qulaq asatyn memleket» tujyrymdamasyn aıqyndap, oryndadyq. Ákim bolǵanda kóptegen qordalanǵan máseleni sheshtik. Bul bir adamnyń jumysy emes. Ol - kóptegen memlekettik organnyń, jergilikti atqarýshy bıliktiń jumysy», - dedi vıtse-premer.

Sonymen qatar ol kópbalaly analarmen kezdesip otyratynyn atap ótti.

«Olarmen árqashan kezdesip otyramyz. Qoǵamnan bir toptyń múshesin bólýge bolmaıdy dep sanaımyz. Biz bárine teń qaraımyz. Muqtaj azamattar bolsa, memleket jáne jergilikti atqarýshy organ, ortalyq memlekettik organ taraby árqashan kómektesýge daıyn», - dedi ol.