Altaı Kólginov: Memleket basshysynyń birinshi tapsyrmasy – aýyldy damytý
«Memleket basshysynyń birinshi tapsyrmasy aýyldyń damýyna, halyqtyń tabysynyń artýyna, jumyspen qamtýǵa baılanysty boldy. Bul joba aýyl turǵyndarynyń ómir súrý deńgeıin arttyrýǵa arnalǵan, olarǵa óz isin ashýǵa múmkindik beredi. Qazir biz Prezıdenttiń tapsyrmalaryn oryndaý maqsatynda jergilikti jerlerde qabyldanyp jatqan sharalarmen tanysý úshin óńirlerdi aralap júrmiz», - dedi Altaı Kólginov.
Kezdesýge qatysýshylar joba jáne nesıeleý sharttaryna qatysty ózderin tolǵandyrǵan suraqtar qoıdy.
«Jobada óte yńǵaıly sharttar qarastyrylǵan. Meniń sútti óńdep, ony satylymǵa shyǵaratyn shaǵyn sharýashylyǵym bar. Endi iri qara mal túrinde taýarlyq nesıe alyp, qaıta óńdeý kólemin jáne tıisinshe otbasylyq kiristi ulǵaıtqym keledi», - dep Aqjar aýyldyq okrýginiń turǵyny Anargúl Qadırova josparlarymen bólisti.
Aqtóbe oblysynyń ákimi Eraly Toǵjanov «Aýyl amanaty» – Prezıdent Qasym-Jomart Toqaevtyń «Qazaqstan Respýblıkasynda aýyldy aýmaqtardy damytýdyń 2023-2027 jyldarǵa arnalǵan tujyrymdamasy týraly» birinshi Jarlyǵy aıasynda óńirde iske asyrylyp jatqan basty jobalardyń biri ekenin atap ótti.
«Aqtóbe oblysy elimizde birinshi bolyp aýqymdy jobany qolǵa aldy.
«Aýyl amanatynyń» birinshi kezeńine oblystyń 24 aýyldyq okrýginiń 43 myńǵa jýyq turǵyny qatysady. Qus sharýashylyǵy boıynsha – 2 182 joba, ósimdik sharýashylyǵynda – 342, shaǵyn kásip boıynsha – 224, kooperatıvterdi jaraqtandyrýǵa baǵyttalǵan 24 joba iske asyrylmaq. Qarjylandyrý 3 mlrd teńgeni quraıdy. Bıyl qosymsha 3,5 mlrd teńge bólindi.
Joba kezinde tek aqshalaı nesıe emes, taýarlyq nesıe beriledi. Atap aıtqanda, 27 iri sharýa qojalyǵy esebinen aýyl turǵyndaryna 6 myń bas mal mal berý josparlandy. Aýyl turǵyndary taýarlyq nesıege alǵan maldy tólmen qaıtarady. Búgingi tańda 42 jeke qosalqy sharýashylyqqa 650 bas mal berildi.
Jobaǵa qatysatyn aýyldarda ony iske asyrý nátıjesinde jumyssyzdar sany 41,4%, ataýly áleýmettik kómek alýshylar sany 49,3% azaıady. Otbasynyń ortasha tabysy 192% artady», - dedi Eraly Toǵjanov.
Hromtaý aýdanynda jobaǵa Aqjar jáne Tasótkel aýyldyq okrýgteriniń turǵyndary qatysady. Munda 43 jumyssyz, 219 ózin-ózi jumyspen qamtyǵan, AÁK alatyn 4 otbasy bar. Birinshi kezeńde olar 738 mln teńge somasyna 336 jobany iske asyrady. 150 joba mal, 11 joba ósimdik, 155 joba qus sharýashylyqtaryn damytý, 13 joba et, kókónis jáne sút óńdeý, taǵy 7 joba kooperatıvterdi jabdyqtaýǵa baǵyttalǵan. Joba iske asqanda Hromtaý aýdanyndaǵy ataýly áleýmettik kómek alýshylardyń sany 42,1% azaıady, oǵan qatysatyn otbasylardyń tabysy keminde 209% artady, ósimdik sharýashylyǵynyń úlesi 25%-dan 31%-ǵa deıin ulǵaıady dep kútilip otyr.
Hromtaý aýdanyndaǵy 14 aýyldyq okrýgtiń 16500-ge jýyq turǵyny «Aýyl amanaty» jobasyna qatysýǵa nıetti. Olar 945 jobany iske asyrady.
Foto: Aqtóbe oblysy ákiminiń baspasóz qyzmeti.
