Altaı Kólginov: LRT jobasyn aıaqtaımyz
NUR-SULTAN. QazAqparat - Jeńil relsti (LRT) jobasy aıaqtalady. Elorda ákimi Altaı Kólginov osylaı málim etti, dep habarlaıdy QazAqparat qala ákiminiń baspasóz qyzmetine silteme jasap.
«Joba aıaqtalady. Prezıdenttiń tapsyrmasy boıynsha LRT qurylysy jobasyn edáýir ońtaılandyrdyq. Qabyldanǵan sharalardyń nátıjesinde shyǵyndardy únemdeý shamamen 1,2 mlrd dollardy quraıdy. Onyń ishinde nesıege qyzmet kórsetý boıynsha únemdeý 800 mıllıon dollardan asady, qurylys-montaj jumystaryna únemdeý - 350 mıllıon dollardy quraıdy. Aıaldama beketteri 18-den 11-ge deıin, jyljymaly quram 19-dan 12 deıin qysqartyldy, poıyzdy kútý aralyǵyn 10 mınýtqa deıin arttyryp, jaıaý júrginshiler men jerasty ótkelderin ońtaılandyramyz», - dedi A.Kólginov.
Onyń aıtýynsha, Qytaıdyń Damý Bankindegi qaryz tolyqtaı óteldi, sondaı-aq konsortsıým aldyndaǵy qaryzdy óteýge qarajat jumsaldy. Oblıgatsııalyq qaryz qarajaty tartyldy.
