Altaı Kólginov LRT qurylysy qanshalyqty arzandaǵanyn aıtty
NUR-SULTAN. QazAqparat – Elordanyń LRT jobasy tolyq aıaqtalady. Bul týraly búgin Ortalyq kommýnıkatsııalar qyzmetindegi baspasóz máslıhatynda Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
«Prezıdent tapsyrmasyna sáıkes, LRT qurylysy jobasyn aıtarlyqtaı ońtaılandyrdyq. Ózderińizde bilesizder, syn kóp boldy. Bastapqyda Qytaıdyń kommertsııalyq bankinen 20 jylǵa nesıe alynǵan. Osy ýaqyttyń ishinde artyq tólem 800 mln dollar bolar edi. Biz odan bas tarttyq jáne ishki zaımǵa aýystyq», - dedi qala basshysy.
Onyń atap ótýinshe, qabyldanǵan sharalardyń nátıjesinde shyǵyndardy únemdeý shamamen 1,2 mlrd dollardy quraıdy. Onyń ishinde: nesıege qyzmet kórsetý boıynsha únemdeý 800 mıllıon dollardan asady, qurylys-montaj jumystaryna únemdeý 350 mıllıon dollar bolady.
«Qazir jospardan 7 stansaǵa kem. Bul da qarajatty únemdeýge múmkindik berdi. Jyljymaly quramǵa qatysty aıtar bolsam, bastapqyda jobada qozǵalys aralyǵy 3 mınýt bolýy tıis edi. Biz turǵyndar sanyn jáne júktemeniń qandaı bolatyndyǵyn eskerdik. Mamandarmen eseptep, bastapqy kezeńde 10 mınýt jetkilikti dep sheshtik. Odan keıin jıirek bola bastaıdy. Jer asty ótkelderdiń de sanyn qysqarttyp, nátıjesinde 350 mln teńge qarajat únemdedik. Jalpy únem kólemi shamamen 1,2 mlrd dollardy quraıdy. Kórip otyrǵandaryńyzdaı, joba birshama arzandady. Tolyqtaı alǵanda LRT-ny salyp bitirý mindeti tur. Sebebi kóptegen dúnıe jasalyp, ınfraqurylym tartylyp qoıylǵan», - dedi Altaı Kólginov.
