Altaı Kólginov kommýnaldyq qyzmetkerlerge eren eńbegi úshin alǵys aıtty

NUR-SULTAN. QazAqparat - Elorda ákimi Altaı Kólginov kommýnaldyq qyzmetkerlerdi alǵys kúnimen quttyqtap, olardyń adal ári qajyrly eńbeginiń mańyzyn atap ótti, dep habarlaıdy QazAqparat qala ákiminiń resmı saıtyna silteme jasap.

«Siz aýa raıynyń qolaısyzdyǵyna qaramastan kúndiz-túni eńbektenip jatyrsyz. Óz tarapymyzdan qoldaý kórsetip, eńbek jaǵdaıyn jaqsartýǵa tyrysamyz: kommýnaldyq qyzmet parkin jańartamyz. Eńbegińizdi joǵary baǵalaımyz. Atqaryp jatqan adal jumysyńyz úshin alǵys aıtamyn», - dedi qala ákimi Altaı Kólginov.

Elorda ákimi Altaı Kólginovtyń tapsyrmasyna sáıkes 2020 jyldyń basynan beri kommýnaldyq qyzmetkerlerdiń eńbekaqysy kóterilip, syıaqy berildi. Alpysbaı Hamytbek kommýnaldyq qyzmette 6 jyl jumys istep keledi.

«Men shetkeri aımaqtyń turǵynymyn. Jumysqa 3:30-da turamyn. Avtobýs alyp ketedi. Tańǵy saǵat 6-da biz jumysqa kirisemiz. Jumys óte kóp. Tipti aýa raıynyń qolaısyzdyǵyna baılanysty 2-3 kún úıge barmaı, jumys jasaǵanymyz bar. Kommýnaldyq qyzmette mine, altynshy jyl jumys jasap kelemin. Osy ýaqyt ishinde bıylǵydaı qar kórmeppin. Bizdiń jumysymyzdy bári kóre bermeıdi, sebebi qardy tazalaǵan soń qaıta qalyń qar jaýady. Biz kúshimizdi aıamaı, qalanyń taza bolýy úshin jumys isteımiz», - deıdi Alpysbaı Hamytbek.

Qalanyń kommýnaldyq qyzmetkerleri kúsheıtilgen tártipte jumys isteıdi. Qysqy kezeńde 5 mln 28 myń tekshe metr qar shyǵaryldy, ótken jyly 1 mln 900 myń tekshe metr qar shyǵarylǵan.

«Qazgıdromet» RMK málimetinshe, aqpanda jaýǵan qar mólsheri normadan úsh ese joǵary boldy (norma - 15 mm, 45 mm tústi). Qańtarda - 53 mm (norma 16 mm), jeltoqsanda - 39 mm (norma - 22 mm ) qar tústi. Byltyr qarasha aıynan naýryz aıyna deıin 99 mm qar tústi, bıyl qarasha aıynan aqpan aıyna deıin 184 mm qar tústi. Bul normadan eki ese joǵary.