Altaı Kólginov qoǵamdyq kóliktiń ne úshin toqtatylǵanyn túsindirdi
NUR-SULTAN. QazAqparat – Nur-Sultan qalasynyń ákimi Altaı Kólginov qoǵamdyq kóliktiń ne úshin toqtatylǵanyn túsindirdi, dep habarlaıdy QazAqparat tilshisi.
«Shtabta ınfektsııa taralymyn azaıtyp, juqtyrý tizbegin úzý týraly sheshim qabyldandy. Tájirıbe kórsetkendeı, qoǵamdyq kólik – aýrý juqtyrý qaýpi bar negizgi oryn. TJ rejımine deıin elordada kúnine 750 myń adam qoǵamdyq kólikti paıdalanatyn. Bul – aýqymdy kórsetkish. Qoǵamdyq kólikti toqtatqanda ınfektsııa taralymynyń aıtarlyqtaı azaıǵanyn baıqadyq. Sondyqtan, karantın kezinde de adamdardyń densaýlyǵyna qater tónbeýi úshin qoǵamdyq kólik toqtatyldy», - dedi ákim Ortalyq kommýnıkatsııalar qyzmetinde ótken brıfıngte.
Onyń aıtýynsha, qaladaǵy ómirlik mańyzy bar kásiporyndar qyzmetkerleri arnaıy tasymaldanady. Ákimdik ózge de iri kásiporyndardan qyzmetkerlerin jumysqa jetkizýdi uıymdastyrýdy talap etedi.
«Eger epıdemııalyq jaǵdaı jaqsarsa, ýaqytsha keste boıynsha qoǵamdyq kólikti iske qosýymyz múmkin. Biraq, avtobýs ýaqytyn 21:00-den 19:00-ge qysqartqanda, halyqtyń sońǵy avtobýsqa úlgerýi úshin toptap jınalatynyn kórdik. Saldarynan aýrý juqtyrý qaýpi artty. Tipti, avtobýs júrgizýshileriniń, jolaýshylardyń vırýs juqtyrý oqıǵasy tirkeldi», - dedi ákim.
Aıta keteıik, Nur-Sultanda koronavırýs ınfektsııasyn juqtyrǵan 61 adam qaıtys boldy.
