Altaı Kólginov: Qazir epıdemıologııalyq jaǵdaı kúrdeli
NUR-SULTAN. QazAqparat – Nur-Sultan qalasynyń ákimi Altaı Kólginov qaladaǵy epıdemıologııalyq jaǵdaıdyń qıyndaı túskenin aıtty, dep habarlaıdy QazAqparat tilshisi.
«Qazir epıdemıologııalyq jaǵdaı kúrdeli kúıinde qalyp otyr. Maýsym aıynyń basynda aýrý juqtyrý sany tómendegen edi, táýligine shamamen 100-110 jaǵdaı anyqtalatyn jáne «qyzyl» aımaqtan shyǵýymyz kerek edi. Biraq «Delta» shtamy paıda bolyp, qazir aýrý kúrt óskenin baıqap otyrmyz. Búgin 678 jaǵdaı tirkelip otyr. Sanıtarlyq dárigerler qosymsha shekteý sharalaryn qabyldady. Bul májbúrli shara. Biz densaýlyq saqtaý júıesin aıtarlyqtaı jańǵyrttyq», - dedi A. Kólginov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, qaladaǵy 14 statsıonarda 2 myń tósek-oryn bolsa, onyń 75%-ynda naýqastar jatyr.
«Kún saıyn Nur-Sultan statsıonarlaryna 200-ge jýyq naýqas túsedi. Zerthana sany 2-den 27-ge deıin ulǵaıtyldy. Pandemııa basynda test kóp júrgizilmeıtin, al qazir táýligine 10 myńǵa deıin test jasalady», - dedi elorda ákimi.
