Altaı Kólginov kásipkerlerdi aǵash otyrǵyzýǵa shaqyrdy
NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda qalany kógaldandyrý jospary týraly málim etti, dep habarlaıdy elorda ákimdiginiń resmı saıty.
«Elordamyz jyl saıyn kórkeıip keledi. Buryn batpaq, qaraýsyz qalǵan jerler «jasyl araldarǵa« aınalyp jatyr. Bıyl 1 mıllıonnan astam, ıaǵnı rekordtyq kólemde jasyl jelek (aǵashtar, butalar, kóshetter jáne t. b.) otyrǵyzýdy josparlap otyrmyz. Sonyń ishinde elordanyń jasyl beldeýinde de otyrǵyzamyz. Bul jasyl «oazıs« qalasyn qurýǵa múmkindik beredi.
Qalanyń barlyq aýdandarynda sońǵy birneshe apta boıy «Birge - taza Qazaqstan« ekologııalyq aılyǵy ótip jatyr. Búgin «Astana Balet« mańyndaǵy aýmaqta aǵash otyrǵyzýǵa qatystym. Qazaqstan halqy Assambleıasynyń elordalyq múshelerimen birge Nur-Astana meshitiniń janyna aǵash otyrǵyzdyq, sondaı-aq áriptesterimizben birlesip, botanıkalyq baqta aǵash otyrǵyzdyq. Bul jumystarǵa qala turǵyndary men eriktiler belsendi qatysýda. Alǵys aıtamyn!
Kásipkerlerdi, SOO/SO/ShOB basshylaryn, OSI (PIK) basqarýshylaryn irgeles jatqan aýmaqtardy belsendi kógaldandyrýǵa shaqyramyn. Osylaısha, siz óz nysandaryńyzdyń estetıkalyq kelbetin jaqsartyp, qala turǵyndary úshin qolaıly jaǵdaı jasap, ekologııany jaqsartýǵa da eleýli úles qosasyz!
Tek saıabaq aýmaqtaryn, turǵyn úıler men aýlalardy abattandyryp qana qoımaı, sonymen qatar qalamyzdyń kórikti jerlerin de kógaldandyramyz. Mysaly, «Astana Opera« aýmaǵynda emen baǵy, Trıatlon saıabaǵynda sıren baǵy bolady. Saıabaqtarda, skverlerde, býlvarlarda sýarý júıesi 5 ese jaqsardy. Sýarý júıesi avtomatty jáne mehanıkalyq rejımde júzege asyrylady.
Nur-Sultandaǵy ekologııalyq aımaqtar sany jyl saıyn ósedi.
Memleket basshysy halyqqa Joldaýynda el men qalalardy aýqymdy kógaldandyrýdyń mańyzdylyǵyn atap ótti», — dep jazdy elorda ákimi.
