Altaı Kólginov qala problemalaryn sheshý joldary týraly aıtty
NUR-SULTAN. QazAqparat - Elorda ákimi Altaı Kólginov qalalyq ınfraqurylym problemalarynyń erekshelikterin atady, dep habarlaıdy QazAqparat tilshisi.
«Injenerlik jeliler materıalyna qaraı 30, 50 jylda tozý ereksheligine ıe. Al endi bir materıaldar 10 jyldan keıin-aq jaramsyz bolyp qalady. Bul jańaryp otyratyn protsess. Sondyqtan ony únemi jańǵyrtyp otyrý qajet», - dedi Altaı Kólginov elorda ákimdiginde ótken qoǵamdyq tyńdaýdan keıin.
BAQ ókilderine bergen suhbaty barysynda qala basshysy mundaı problema barlyq ýaqytta ózekti bolatyndyǵyn aıtty.
«Jalpy qalalyq problemalar negizinen jerdiń astynda jatady. Qysta tynysh uıyqtap, jyly jerde ómir súrý úshin jylý jelilerin aýystyrý qajet. Sol sııaqty sý taza bolýy úshin jańǵyrtý júrgizilýi tıis. Bizde jańa eldi mekenderdiń paıda bolýyna baılanysty bul máseleler barlyq ýaqytta ózekti bolady. Bir máseleni sheshseń, taǵy ekeýi paıda bolady. Bul qala ómiri, soǵan daǵdylaný kerek», - dedi ol.
Ol qala tóńiregindegi turǵyn úı alabtarynyń ınfraqurylymdyq problemasyn sheshý úshin qansha qarajat qajettigin aıtty.
«Bul barlyq máselelerdi úsh jyldyq bıýdjette qarastyramyz. Bul biz úshin basymdyq. Turǵyndar ózderin tolǵandyratyn máselelerdi aıta bersin. Sebebi barlyq máseleni bir mezette sheshe almaımyz. Qajettilikti qaradyq, bir qaraǵanda 245 mlrd teńge qajet. Muny bir jyldyń ishinde sheshe almaımyz. Bul bizdiń alǵashqy esepteýimiz ǵana. Osyǵan deıin barlyq eldi mekenderdi, turǵyn úı alabtaryn aralap shyǵyp, adamdardy tolǵandyratyn máselelerdi tyńdadyq», - dedi elorda basshysy.
