Altaı Kólginov ınvestorlardy qalalyq saıabaqtardy damytýǵa shaqyrdy
«Biz qalany «Nur-Sultan - jaıly qala» tujyrymdamasyna sáıkes damytyp jatyrmyz. Elorda ómir súrý úshin de, taza aýada serýendeý úshin qolaılybolýy tıis. Senbi jáne jeksenik kúnderi áriptesterimmen qala saıabaqtaryn aralap shyqtym. Qoǵamdyq keńistikterde (saıabaqtar, gúlzarlar) jaǵdaı jasap jatyrmyz. Jaıaý júrginshi jáne velesıped joldaryn tósep, sport túrlerimen belsendi aınalysý úshin alańdar ashyp jatyrmyz. Balalar úshin oıyn aımaqtaryn ornatyp jatyrmyz. Mundaı jumystar qalanyń oramishilik aýmaqtarynda da júrgizilip jatyr», - dep jazdy qala ákimi Facebook paraqshasynda.
Onyń atap ótýinshe, áli de atqarar is jetip artylady. Máselen, elorda turǵyndary qalalyq saıabaqta attraktsıondar, akvapark, jaǵajaı, basseın, kóńil kóterýge arnalǵan túrli aýmaqtar bolǵanyn qalaıdy.
«Olardyń sanyn arttyryp qana qoımaı, sapasyn da jaqsarta túsý qajet. Onyń ishinde jeke ınvestıtsııa tartý esebinen de. Investorlarymyzdy qalalyq saıabaqtardy damytýǵa qatysýǵa shaqyramyn. Senimdi basqarýǵa berýdi de qarastyrýǵa daıynbyz. Basty maqsat pen mindet - elorda turǵyndary men qonaqtarynyń taza aýada demalýyna sapaly oryn qurý. Bul oryndar otbasynyń barlyq múshelerin ózine tartatyn orynǵa aınalýy qajet», - dedi ol.
Elorda ákiminiń jazýynsha, «jasyl beldeý» aýmaǵynda jol-soqpaq jelisin jańǵyrtý jumystary júrgizilip jatyr. Osy aýmaqta skeıtbordıng, rolık, tennıs, fýtbol alańdary, balalar oınaıtyn aýmaq jasalady. Al «jasyl beldeýge» jaqyn ornalasqan ıppodrom bazasy ıppoterapııa, sporttyń ulttyq jáne klassıkalyq túrlerin ótkizý jáne daıyndyq, atpen serýendeý baǵyttarynda damytylady.
«Álemdik indet ishki týrızmge munan da zor nazar aýdarymyz qajettigin kórsetip berdi. Qalalyq saıabaqtardy birlesip damytý úshin ınvestorlarymyzdy shaqyramyn. Elordalyqtarǵa jáne qalaǵa qajetti ári qyzyqty jobalarǵa qoldaý kórsetemiz», - deıdi Nur-Sultan qalasynyń ákimi.
