Altaı Kólginov elordanyń sý tasqyny kezeńine daıyndyǵyn baıan etti
NUR-SULTAN. QazAqparat – Nur-Sultan qalasynyń ákimi Altaı Kólginov kóktemgi sý tasqyny kezeńinen qaýipsiz ótý úshin qandaı sharalar júrgizilip jatqanyn aıtyp berdi, dep habarlaıdy QazAqparat tilshisi.
«Ákimdik arnaıy shtab quryp, qar erý kezinde tasqynnyń aldyn alý boıynsha keshendi josparyn bekitti. Sý tasqyny bolýy yqtımal 37 oryn anyqtaldy. Olardyń jeteýi Almaty aýdanynda, on ekisi Baıqońyr aýdanynda, on úshi Esil aýdany men beseýi Saryarqa aýdanynda ornalasqan. Árqaısysy úshin jumys túrleri, qajetti materıal mólsheri, qarjylandyrý jáne jaýapty oryndaýshylar bekitildi. Osyǵan baılanysty barlyq kúsh pen tehnıka eń aldymen qardy shyǵarýǵa jáne qalanyń aryq júıesin tazartýǵa baǵyttaldy», - dedi Altaı Kólginov Úkimet otyrysynda.
Qala ákiminiń aıtýynsha sý tasqyny kezeńine daıyndyq boıynsha keshendi jumys júrgizilgen. Onyń ishinde «Nurly jol» temirjol vokzaly, Nursultan Nazarbaev halyqaralyq áýejaıy, kontrregýlıator jáne turǵyn alaptaryna erekshe kóńil bólinýde.
«Gıdrotehnıkalyq qurylystardyń daıyndyǵy boıynsha aıtar bolsaq, birinshiden mınıstrlikter «Qazsýsharmen» birlesip, «Astana sý qoımasynyń» josparly kestesin bekitti. Naýryz aıyna deıin sý qoımasyna 230 mln tekshe bos kólem qurý josparlanýda. Ekinshiden kóktemgi sý tasqyny kezeńinen qaýipsiz ótý maqsatynda áýejaı mańyndaǵy Maıbalyq kólinen Nura, Esil kanalyna deıin qoldanystaǵy kanaldyń sý ótkizý qabilettigin arttyrý jumystary bastaldy. Úshinshiden búgingi tańda Beısekov kóshesi men kópirge deıingi aralyqta Esil ózeniniń arnasyn keńeıtý jumystary júrgizilýde», - dedi shahar basshysy.
Qala ákimi sonymen qatar tórtinshiden barlyq 16 turǵyn alapta qar shyǵarý jumystary kúsheıtilip, «Elıta» turǵyn úı alabynyń shyǵys jaǵyndaǵy bóget nyǵaıtylǵanyn, Kóktal-1 turǵyn úı alabynda eki ýaqytsha úımejal salynǵanyn, «Óndiris» turǵyn alabyndaǵy Sarybulaq arnasyn tazartý jumystary júrgizilip jatqanyn jetkizdi.
«Memlekettik materıaldyq rezervten arnaıy qosymsha tehnıka alyndy. Qalanyń azamattyq qorǵaý memlekettik júıesin 2020 jylǵy sý tasqyny kezeńine daıyndaý maqsatynda qalanyń kommýnaldyq qyzmetkerleri men quqyq qorǵaý qyzmetkerleri jasaqtaldy. Atap aıtqanda 663 adamnan turatyn jeke quram, 185 tehnıka, 14 júzý quraly men 67 motopompa, bir tikushaq daıyn», - dedi ol.
