Altaı Kólginov elordanyń qaı turǵyn úı alabyna eń birinshi gaz beriletinin aıtty
NUR-SULTAN. QazAqparat - Nur-Sultan qalasynyń ákimi Altaı Kólginov gaz qubyrlaryn dánekerleý jumystaryn qadaǵalady, dep habarlaıdy QazAqparat tilshisi.
«Búgin gaz qubyrlaryn dánekerleý jumystaryn qadaǵalap shyqtym. Kelesi jylý berý maýsymynda JES-1, 2, 3, Kóktal-1, 2, Agroqalashyq, Óndiris, Temirjol, ońtústik-Shyǵys turǵyn úı alaptaryn gazben jylytýdy josparlap otyrmyz. Tehnıkalyq jáne avtorlyq qadaǵalaý qyzmetterine dánekerleý jumystarynyń oryndalý sapasyna aıryqsha nazar aýdarý qajet. Qubyrlardyń bútindigin jáne jaryqǵa jol bermeý maqsatynda mamandar denekerlengen qospalardy rentgenmen tekserýde», - dep jazdy elorda ákimi Instagram-daǵy paraqshasynda.
Onyń atap ótýinshe, qazirgi ózinde qalada tútin baıqalyp otyr. Al ol ekologııany buzyp, adamdardyń densaýlyǵyna zııanyn tıgizedi.
«Gazdandyrý aýaǵa zııandy shyǵaryndylardy 6 ese, qatty qaldyqtardy 40 tonnaǵa azaıtady. Elordany gazdandyrýdy 3 kezeńmen júrgizemiz», - dedi Altaı Kólginov.
