Altaı Kólginov elordalyqtardyń muń-muqtajyn tyńdady

NUR-SULTAN. QazAqparat – Elorda ákimi Altaı Kólginov senbi jáne jeksenbi kúnderi qalanyń 54 turǵynyn qabyldap, muń-muqtajyn tyńdady, dep habarlaıdy QazAqparat.

«Turǵyndardyń negizgi máseleleri: turǵyn úı satyp alý, bilim, densaýlyq saqtaý jáne taǵy basqalary. Ózekti máselelerdiń bir bóligi qabyldaý barysynda sheshimin tapty, qalǵandary baqylaýǵa alyndy. Azamattardy qabyldaý »Januıa« otbasy ınstıtýtyn qoldaý ortalyǵynda jáne aýdandyq ákimdikterde júıeli túrde ótkizilip turady», - dep jazdy A.Kólginov Instagram-daǵy jeke paraqshasynda.

Sondaı-aq qala ákimdigi shahar basshysy men onyń orynbasarlarynyń jeke qabyldaýyna Beıbitshilik kóshesi, 11 meken jaıy boıynsha (dúısenbiden jumaǵa deıin, saǵat 09.00-den 18.00 aralyǵynda) nemese 556483, 556482, 556486 jáne 556485 telefondary arqyly jazylýǵa bolatynyn eske saldy.