Altaı Kólginov elordadaǵy zańsyz kólik turaqtaryna qatysty túsinikteme berdi
NUR-SULTAN. QazAqparat – Nur-Sultan qalasynyń ákimi Altaı Kólginov qaladaǵy zańsyz avtokólik turaqtaryna qatysty óz pikirin bildirdi, dep habarlaıdy QazAqparat tilshisi.
«Bul jerde zańǵa súıený kerek. Qalalyq ákimdiktiń kelisiminsiz avtokólik turaǵy ashylsa, demek ol zańsyz degen sóz. Ákimdik tek zań aıasynda jumys isteıtinderdi qoldaıdy. Biz qala turǵyndarynyń kólik turaǵyna qatysty qıyndyqqa ushyrap nemese artyq aqsha tólemegenin qalaımyz», - dedi A. Kólginov tilshilerdiń suraqtaryna jaýap bere turyp.
Onyń aıtýynsha, elordadaǵy «Mınıstrlikter úıi» jáne «Nursaıa» turǵyn úı kesheni mańyndaǵy avtoturaqtar zańǵa sáıkes jumys isteýde.
«Al ákimdiktiń ruqsatynsyz jumys istep jatqan avtokólik turaqtaryna qatysty turǵyndardyń tarapynan shaǵymdar túsip jatyr. Jáne avtoturaq qyzmetine jaýapty memlekettik organdar tarapynan da suraqtar týyndaýda», - dedi ol.
Eske sala ketsek , ótken jyldyń qarasha aıynda Nur-Sultan qalasynyń ákimdigi kelisimshart mindettemelerin oryndamaǵany jáne talaptardy elemegeni úshin «Parkovochnoe prostranstvo» JShS-men kelisimshartty buzý týraly sotqa aryz berdi. Ol boıynsha atalǵan uıymǵa kólik turaqtary úshin tólemderdi zańsyz jınaǵan degen aıyp taǵylǵan bolatyn.
