Altaı Kólginov elordadaǵy epıdahýalǵa baılanysty Úkimetke esep berdi
NUR-SULTAN. QazAqparat – Jyl basynan beri elordada karantın talaptaryn saqtamaǵan 520 zańdy tulǵaǵa 110 mln teńge aıyppul salyndy. Bul týraly búgin Úkimet otyrysynda Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
«Elordada ótken táýlikte indet juqtyrýdyń 250 jaǵdaıy tirkeldi. Vırýstyń odan ary taralýyna jol bermeý úshin birqatar is-shara qabyldandy. Birinshiden, ınfektsııalyq statsıonarlarda 2 239 tósek-oryn ázirlendi. Ondaǵy búgingi júkteme 60 paıyzdy quraıdy. Qalǵan patsıentter úıden em alýda. 198 reanımatsııalyq tósek-oryn ázirlendi, júkteme – 58 paıyz. Rezervte 4 myńǵa jýyq tósek-oryn daıyndalǵan. Ekinshiden, zerthanalar sany 2-den 27-ge deıin ulǵaıtylǵan. Onda táýligine 13 myńnan astam test júrgizýge múmkindik bar. Barlyǵy 1 mln 320 myń testieý júrgizildi. Eger jyl basynda kún saıyn 3 myń zertteý júrgizilse, qazir 8 myńnan astam zertteý júrgiziledi», - dedi Altaı Kólginov.
Qala ákimi úshinshiden, ambýlatorııalyq qyzmettiń jumysy edáýir jaqsarǵanyn, 250 mobıldi brıgada jumys isteıtindigin aıtty. Ambýlatorııalyq baqylaýdaǵy patsıentter tegin dári-dármekpen qamtylǵan. Olar tolyqqandy jazylyp shyqqansha ýchaskelik dárigerlerdiń únemi qaraýynda bolady.
«Tórtinshi, karantındik is-sharalardy saqtaý jónindegi monıtorıng toptar jumysyn jalǵastyrýda. Jyl basynan beri ákimshilik jaýapkershilikke 110 mln teńgege 520 zańdy tulǵa tartyldy. Sot sheshimimen 36 nysannyń jumysy toqtatyldy. «Ashyq» jobasyna 300-den astam kásipkerlik sýbektisi qosyldy», - dedi ol.
Elorda basshysynyń dereginshe, osy ýaqytqa deıin 114 myńnan astam adam vaktsınanyń birinshi komponentin aldy. Ekpe pýnktteriniń sany 36-dan 100-deıin artty. Olardyń jumys ýaqyty 8-den 24-00-ge deıin uzartyldy. Eńbek ujymdaryn vaktsınamen qamtý úshin kóshpeli medıtsınalyq brıgadalar quryldy.
«Epıdemıologııalyq ahýal turaqty baqylaýda. Jumys jalǵasyp jatyr», - dedi Altaı Kólginov.
