Altaı Kólginov elordada sportty damytý úshin qandaı sharalar qolǵa alynǵanyn aıtty
NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda qalada sportshylar úshin qandaı jaǵdaı jasalyp jatqanyn málim etti, dep habarlaıdy elorda ákimdiginiń resmı saıty.
«Іri sport nysandaryn balalarymyz úshin ashyq ári qoljetimdi etemiz. Sporttyq ǵımarattar chempıonattardy/oıyndardy, sportshylardyń jattyǵýyn ótkizýge arnalǵan alańdar ǵana emes, sonymen qatar oqýshylarymyz úshin sabaq ótkizetin oryn bolýy tıis. Bul olardyń jattyǵýlarynyń sapasyna oń áser etedi, sonymen qatar jas turǵyndarymyzdy yntalandyrady.
Jan-jaqty jaǵdaı jasaý úshin sport nysandaryn jóndeımiz. Mysaly, bıyl «Astana-Arena» stadıonynda jumystar júrgizildi. Drenaj júıesi, sýarý júıesi jańartyldy (buryn qolmen sýaryldy), endi kógaldar FIFA standarttaryna sáıkes keledi, kıim aýystyratyn bólmeler aǵymdaǵy jóndeýden ótti. Sonymen qatar, ǵımarattardaǵy bos úı-jaılardy utymdy paıdalaný qajet. «Astana Arena» stadıony bazasynda jaýyngerlik óner zaly ashyldy.
Búgin «Astana» fýtbol klýbynyń bas jattyqtyrýshysy Andreı Tıhonovpen jáne «Astana» FK gendıri Davıd Lorııamen yntymaqtastyqtyń aldaǵy josparlary, balalarymyzdyń stadıon bazasynda jattyǵýlaryn ótkizý, onyń ishinde sportshylar ishki chempıonatta óner kórsetetin fýtbol klýby nysanynyń jańa túri talqylandy.
Sondaı-aq biz úrlemeli fýtbol kortyn jóndedik (Jırentaev kóshesi, 15 B, Almaty aýdany). Velosport boıynsha balalar men jasóspirimder sport mektebine jáne atys boıynsha qurama komandaǵa qosymsha sporttyq qural-jabdyqtar berildi. Bizdiń mindetimiz - balalar men jasóspirimder sport mektepterin, federatsııalardy qoldaý jáne turǵyndardy salaýatty ómir saltyna, sportqa baýlý.
Memleket basshysynyń tapsyrmasy boıynsha qala turǵyndaryn buqaralyq sportqa baýlý úshin saıabaqtar, skverler, aýlalar, jańa sport keshenderin salamyz. Bıyl 150 aýla men 40 qoǵamdyq keńistik salynady. Olardyń barlyǵy kóp fýnktsııaly bolady», - dep jazdy elorda ákimi.
