Altaı Kólginov elordada baspana salý qarqynyn tómendetýdi usyndy

NUR-SULTAN. QazAqparat – Bas shahardyń ákimi Altaı Kólginov elordadaǵy turǵyn úı qurylysynyń qarqynyn báseńdetýdi usyndy. Óıtkeni, quzyrly organdar olardy qajetti ınjenerlik jelilermen qamtamasyz etip úlgermeı jatyr, dep habarlaıdy QazAqparat tilshisi.

Ákimniń aıtýynsha, jyl saıyn qalada 3 mln sharshy metr turǵyn úı salý mindeti qoıylady. Sońǵy úsh jylda 8 mln sharshy metrden baspana paıdalanýǵa berilgen.

«Jyl saıyn 3 mln sharshy metr turǵyn úı - bul óte úlken qarqyn. Máselen, 2019 jyly 1 mln 700 myń sharshy metr, 2020 jyly - 3 mln, 2021 jyly – 3 mln 20 myń sharshy metr turǵyn úı salyndy. Olardyń barlyǵyn ınjenerlik jelilermen qamtamasyz etý qajet. Biz qarqyndy báseńdeteıik. Óıtkeni biz úlgermeı jatyrmyz. Ásirese, jańa qurylys aýdandary qarqyndy damýda», - dedi Altaı Kólginov.

Sonymen qatar, elorda ákimi astanada 10 jyl boıy salynyp jatqan úshinshi jylý elektr stantsııasynyń qashan aıaqtalatynyn málimdedi.