Altaı Kólginov elordada avtobýstar qashan qatynaıtynyn aıtty
NUR-SULTAN. QazAqparat - Elordada 11 mamyrdan keıin qoǵamdyq kólikterdiń qozǵalysy jandanýy múmkin. Bul týraly «Astana» telearnasyna suhbat bergen elorda ákimi Altaı Kólginov aıtty, dep habarlaıdy QazAqparat tilshisi.
«Biz 11 mamyrdan keıin qoǵamdyq kólikterdiń qozǵalysyn jandandyrýdy memlekettik komıssııaǵa usynýdy josparlap otyrmyz. Epıdemıologııalyq ahýaldy da baqylaıtyn bolamyz. Munan ary ustap turýǵa bolmaıdy. Degenmen, jańa talaptar bolady, júrgizýshi qorshalady jáne baılanysty tómendetý úshin qolma-qol aqshasyz jolaqy tóleý qoldanylady. Jolaýshylar maskamen, qolǵappen júrýleri qajet. Antıseptık qoldanǵany jón», - dedi qala basshysy.
Elorda ákiminiń aıtýynsha, qazirgi ýaqytta qala dárihanalarynda qorǵanys quraldary bar. Olarǵa 5 mln maska jetkizildi. Munan bólek, turmysy tómen adamdarǵa 2 mln maska tegin taratyldy.
«Buǵan qosa, Halyqqa qyzmet kórsetý ortalyqtarynyń jumysyn da jandandyrýdy kózdep otyrmyz. Ol jerde de jańa talap - ara-qashyqtyq 1,5-2 metr bolýy tıis. Ony syzyp ta qoıdyq. Muny Arnaýly halyqqa qyzmet kórsetý ortalyqtarynda, bankterde, azyq-túlik, azyq-túlikke jatpaıtyn taýarlar, qurylys zattary dúkenderinde beıimdeýden ótkizdik. ıAǵnı, biz kezekte turyp úırenýimiz qajet. Ózimizdi qorǵaý úshin áleýmettik ara qashyqtyqty saqtaýǵa tıispiz. Bul da mańyzdy mádenıet», - dedi Altaı Kólginov.
