Altaı Kólginov elorda turǵyndaryna úndeý jasady
«Karantın alynǵannan keıin epıdemıologııalyq jaǵdaıdyń qalaı bolaryna taldaý jasadyq. Boljamǵa sáıkes, jaǵdaı birden jaqsaryp ketpeıdi. ORVI maýsymyn eskersek jyldaǵydaı medıtsınalyq mekemelerge aýrytpalyq túsedi. Qazirdiń ózinde daıyndyq jumystaryn júrgizip jatyrmyz. Emhana, aýrýhanalarǵa qosymsha kómek kórsetildi. 600-den astam flýometr, 500-ge jýyq ottegi kontsentratory, 500-ge jýyq arnaıy tósek-oryn, ókpeni jasandy jeldetý jáne KT apparattary alyndy. Aldaǵy ýaqytta jedel járdem kólikteri de jetkiziledi. Eki apta ishinde qalaǵa 110 tonnadan astam dári jetkizildi. Biz bul jumystardy júıeli negizde jalǵastyra beremiz», - dedi A.Kólginov.
Elorda basshysynyń aıtýynsha, qajet bolǵan jaǵdaıda barlyq 16 ınfektsııalyq statsıonar qaıta ashylady.
«Sporttyq ǵımarattar men basqa da birqatar nysan kez kelgen sátte oryndar ázirleı alady. Jasyratyny joq, qala turǵyndary alǵashqy karantınnen keıin sanıtarııa normalaryn saqtamady. Bul, keri áserin tıgizip, indetke shaldyqqandardyń sany kúrt ósti. Dárigerler men medıtsınalyq uıymdar múmkindiginshe baryn salyp jumys istedi. Karantın sharalary ǵana jaǵdaıdy turaqtandyrýǵa múmkindik berdi», - dedi ol.
Atap ótilgendeı, ınfektsııalyq statsıonarlardaǵy tósek-orynǵa suranys shilde aıynyń basynan bastap 99 paıyzdan 18,5 paıyzǵa deıin tómendedi. 16 statsıonardyń beseýi jabyldy. Olarda bolǵan barlyq naýqastar jazylyp shyqty. KVI máseleleri boıynsha jedel járdem shaqyrý sany 9,5 esege jýyq tómendep, táýligine 500-den 53-ke deıin azaıdy. Statsıonarlarda pnevmonııamen aýyratyn naýqastardyń sany 6 ese qysqardy.
№1 jáne №2 qalalyq balalar aýrýhanasy tamyz aıynyń basynan bastap burynǵy rejımde jumys isteı bastady.
«Erteńnen bastap qalalyq emhanalar josparly qabyldaýdy qaıta jalǵastyrady. Biraq indetti juqtyrý qaýpi joıyldy deýge áli erte. Infektsııany toqtatý úshin saqtyq sharalary men sanıtarııa normalaryn barynsha saqtaý qajet», - dep jazdy Altaı Kólginov.