Altaı Kólginov elorda kóshelerin qardan tazartý tártibi qalaı júretinin aıtty
NUR-SULTAN. QazAqparat – Elorda ákimi Altaı Kólginov borannan keıin kóshelerdi qardan tazartqansha qala turǵyndarynan sabyrlyq saqtaýdy surady, dep habarlaıdy QazAqparat tilshisi.
«Qala turǵyndarynan sabyrlyq saqtaýdy suraımyz. Biz barlyq kúshimizdi jumyldyrdyq. Birinshiden, eń úlken joldardy, qoǵamdyq kólikter júretin jerlerdi tazalaımyz. Bul baǵyttaǵy jumystar táýlik boıy júrgizilýde. Qazir jeke kompanııalardyń tehnıkasyn qosymsha jumyldyrmaqpyz. Sonymen birge, emhanalar men aýrýhanalarǵa, dárihanalarǵa nemese basqa da áleýmettik nysandarǵa baratyn joldardy tazalaımyz. Odan keıin ishki joldarǵa kirisemiz. Osy oraıda turǵyndardan bul baǵyttaǵy jumystarymyzǵa túsinistikpen qaraýdy suraımyz», - dedi Altaı Kólginov qalalyq TJ departamentinde ótken otyrysta.
Budan buryn habarlanǵandaı, elorda ákimi boranǵa baılanysty dúrbeleń týdyrýǵa negiz joq ekenin aıtty.
«Eń bastysy, turǵyndar sabyrlylyq tanytyp, qala syrtyna shyqpaýyn surap otyrmyz», - dedi Altaı Kólginov.
Qazirgi ýaqytta qardy shyǵarý úshin júk kólikteri men qardy tıeıtin arnaıy tehnıka, sondaı-aq joldy tazalaıtyn avtogreıderlerdi qosymsha tartý josparlanyp otyr.
