Altaı Kólginov eki myń azamatty qabyldady
NUR-SULTAN. QazAqparat - Qala turǵyndaryna áleýmettik kómek kórsetý boıynsha júıeli sharalar qabyldaý úshin elorda ákimi Altaı Kólginov apta saıyn azamattardy qabyldaıdy. 2019 jyldyń jazynan bastap 2021 jyldyń birinshi jartyjyldyǵyna deıin elorda ákimi eki myń turǵyndy qabyldady.
Mysaly qala basshysy bıyl alty aıda 250-den astam qala turǵynynyń problemasyn sheshýge kómektesti. Pandemııany eskere otyryp, azamattardy qabyldaý onlaın-rejımde júrgiziledi.
Nur-Sultan qalasynyń ákimi Altaı Kólginov OKQ alańynda ótken brıfıngte qala turǵyndaryn áleýmettik kómekpen qamtý úshin qandaı sharalar qabyldanǵanyn aıtty.
«Elordalyqtar negizinen turǵyn úı, áleýmettik kómek alý, bilim alý, jumysqa ornalasý, medıtsınalyq kómek sekildi túrli problemalardy kóteredi. Tikeleı kómek kórsetý úshin ǵana emes, áleýmettik kómekpen turǵyndardy barynsha kóp qamtý úshin birqatar mańyzdy ortalyqtar ashyldy. Mysaly, 2020 jyldyń kúzinen bastap turǵyn úı salasynda qyzmet kórsetetin biryńǵaı ortalyq (Respýblıka dańǵyly, 32) jumys isteıdi. Onda turǵyn úı kezeginiń nómiri, kezekke qalaı turý kerektigi, turǵyn úı baǵdarlamalarynyń tetikteri sekildi túrli problemalardyń sheshý jolyn bilýge bolady.
Al áleýmettik máselelerdi sheshý úshin «Januıa» otbasy ınstıtýtyn qoldaý ortalyǵy (Beıbitshilik kóshesi, 14) ashyldy. Onda «bir tereze» qaǵıdaty boıynsha qala turǵyndaryna 70-ten astam memlekettik qyzmet kórsetiledi. Osy jyldyń birinshi jartyjyldyǵynda 25 myńnan astam turǵynǵa kómek pen keńes kórsetildi.
Sonymen qatar, qalada iQala qalalyq qyzmetter ortalyǵy (Qoshqarbaeva, 29) jumys isteıdi. Bul jerde turǵyn úı-kommýnaldyq sektordy «bir tereze» qaǵıdaty boıynsha uıymdastyrý qyzmetin alýǵa bolady. Buryn qyzmet kórsetý reglamenti bolmaǵan: qala turǵyny barlyq monopolısterdi aralap júrip, árqaısysymen jeke-jeke sharttar jasasyp, jıi-jıi habarlasyp, qujattardyń daıyn bolǵanyn bilýi tıis edi. Bul shamamen bir aı ýaqytty alatyn. Qazir iqala.kz saıty arqyly ótinish beriledi, al 3-5 kún ishinde qujattardyń daıyn ekendigi týraly SMS habarlama keledi.
Ótken aıda jastarǵa qyzmet kórsetý ortalyǵy (Gete,1) ashyldy. Munda jastar bilim alý, jumysqa ornalasý sekildi ózekti máseleler boıynsha keńes ala alady. Osy áleýmettik ortalyqtardyń jumysyn kúsheıtýdi ary qaraı da jalǵastyramyz», - dedi elorda ákimi Altaı Kólginov.
Budan basqa, azamattardy qabyldaý kezinde kelip túsetin máselelerdi eskere otyryp, oqýǵa bólinetin granttar sany ulǵaıdy, ońaltý jáne medıtsınalyq ortalyqtar, balalarǵa arnalǵan demalys ortalyqtary men úıirmeler, qoǵamdyq keńistikter (saıabaqtar, gúlzarlar, jelekjoldar) men aýlalar jelisi keńeıtildi, sondaı-aq buzylýǵa, kúrdeli jóndeý júrgizýge jatatyn apatty úıler jáne t.b. tizimge engiziledi.
