Altaı Kólginov áli kúnge qyzmettik kólikti jalǵa alyp júr
ASTANA. QazAqparat - Batys Qazaqstan oblysynyń ákimi Altaı Kólginov áli kúnge qyzmettik kólikti jalǵa alyp, minip júr, dep habarlaıdy QazAqparat.
«Kóp talqylaýǵa túsken qyzmettik kólikti áli satyp alǵanym joq. Biz memleket qarajatyn únemdegimiz keldi jáne ony únemdedik te. Mende bıýdjet qarajaty esebinen satyp alynǵan qyzmettik kólik joq. Biz ony jalǵa alyp otyrmyz. Nemistiń «Aýdı» kóligin 250 myń teńgege jalǵa aldyq. Bul birshama arzanǵa túsedi. Iá, Qazaqstanda qurastyrylǵan kólikter de bar. Biraq, jalǵa alý qazaqstandyq avtomobılden de arzanǵa túsedi», - dedi ol BAQ ókilderiniń saýalyna oraı.
Onyń aıtýynsha, qazirgi ýaqytta Batys Qazaqstan oblysy elimizde quralǵan KIA kóligine tapsyrys berip qoıǵan. Sondyqtan qyzmettik kólikti jalǵa alý jańa jylda aıaqtalatyn bolady.
«Keleshekte barlyǵymyz qazaqstandyq kólik minemiz. Biz qajettilikterge qaraı satyp alamyz. Ózderińizde bilesizder, árbir 5 jyldan soń tozǵan avtomobıl jańartýdy talap etedi. Bizdiń avtomobıl qurastyrýshylar sapasyn qarastyrýlary kerek. Syn aıtaıyn dep otyrǵanym joq. Degenmen, sapasy men baǵasy qolaıly bolsa barlyǵy da satyp alady. Avtomobıl ónerkásibimiz damý ústinde, úlken qarajat salynýda. Sondyqtan avtomobıl ónerkásibiniń bolashaǵy bar dep esepteımin», - dedi Altaı Kólginov Ortalyq kommýnıkatsııalar qyzmetindegi brıfıngten keıin BAQ ókilderine.
