Altaı Kólginov ákim bolyp turǵanda elordada qandaı jumystar atqaryldy
«Qurmetti elorda turǵyndary!
Sizdermen birge astanamyzdyń ıgiligi úshin qyzmet etý men úshin úlken mártebe ári jaýapkershilik boldy. Úsh jarym jyl boıy ózderińizben birge qalamyzdy damytyp, túıtkildi máselelerdi sheshýge, sondaı-aq elordany odan ári kórkeıtýge jáne ómir súrýge qolaıly etý jolynda jumys istedik.
Astana ákimi qyzmetine kirisken sátten bastap kún saıyn qala turǵyndarymen kezdesip júrdim. Sol kezdegi basty máselelerdiń biri úleskerlerdiń máselelerin sheshý bolatyn. Uzaq ýaqytqa sozylǵan árbir qurylystyń artynda páterin jyldar boıy asyǵa kútken myńdaǵan adamnyń taǵdyry turǵanyn bilesizder. Osy ýaqyt ishinde máselesi qordalanǵan 16 myńǵa jýyq úlesker otbasynyń sanyn 2 myńǵa deıin azaıttyq», - dep jazdy Altaı Kólginov.
Odan bólek eks-ákim taǵy bir mańyzdy baǵyt – shet aımaqtarymyzdy damytý jumystary týraly aıtty.
«Elordanyń árbir tórtinshi turǵyny qala shetindegi eldi mekenderde turady. Memleket basshysynyń tapsyrmasymen olardy damytýdyń jeke jospary qabyldandy. Shetkeri eldi mekenderdi damytý boıynsha osy ýaqyt ishinde qyrýar jumys atqaryldy. 700 shaqyrymǵa jýyq gaz qubyry, 42 shaqyrym sý qubyry tartylyp, 17 shaqyrym jańbyr sýyna arnalǵan jeli, 11 shaqyrym káriz jelisi jáne t.b. salyndy. Sondaı-aq eldi mekenderde 250 kóshe, 300 aýla jáne qoǵamdyq oryndar jasaldy», - dedi Altaı Kólginov.
Sondaı-aq, burynǵy qala basshysy ınfraqurylymdyq (gazben jumys isteıtin jylý stansalary, jańa aýyz sý stansasy, nóserli káriz jelileri jáne t.b.), áleýmettik nysandardyń da qurylys kólemi aıtarlyqtaı kóbeıgenin atap ótti.
«Osy ýaqyt ishinde 93 myń oqýshyǵa arnalǵan 45 mektep salyndy. Onyń 36-sy jumys istep tur, taǵy 9-y bıylǵy oqý jylynda paıdalanýǵa beriledi. Memleket basshysynyń tapsyrmasymen «Jaıly mektep» ulttyq jobasy aıasynda 100 myń oqýshyǵa 25 iri mektepti jobalaý bastaldy. 20 myńnan astam áleýmettik páterdi qamtıtyn turǵyn úıler salyndy.
Odan ári júıelilik úshin qalanyń Bas josparyna ózgerister engizilip, polıtsentrıstik aıasynda 420-dan astam ýchaske bekitildi. Olar: mektepter qurylysyna – 158 ýchaske, balabaqshalar – 185, emhanalar, perzenthanalar, ońaltý ortalyqtary – taǵy 78 ýchaske.
«Astana – jaıly qala» bas jospary aıasynda elordany túrlendirý jolynda aýqymdy jumystar júrgizildi. Atap aıtar bolsam, 900-den astam aýla men qoǵamdyq oryndardy jaqsarttyq. Ol jerlerde turǵyndar men qala qonaqtary bos ýaqytyn jaıly ári densaýlyǵyna paıdaly etip ótkize alady. Kishi Taldykólde ekopark salynady. Onyń jobalyq-smetalyq qujattary daıyn, qarjy da bólindi», - dedi ol.
Odan bólek, burynǵy qala basshysy «Uly dalanyń» boıynan jańa kópir ashylǵanyn, Táýelsizdiktiń boıynan taǵy bir kópir salynyp jatqanyn, 400 kóshe jóndelgenin eske saldy.
«Sonymen birge, qalanyń únemi damyp otyratyn tiri organızm ekenin eskersek, jylýmen, sýmen, elektrmen jabdyqtaý jáne t.b. ınfraqurylymdyq nysandardy keńeıtý jáne jańadan salý qalanyń tynys-tirshiligin qamtamasyz etýde árqashan mańyzdy ról atqarady. Astana turǵyndarynyń sany jyl saıyn artyp keledi, bul qala basshylyǵynyń aldyna jańa talaptar men jańa mindetter qoıyp otyr.
Elordamyzdyń damýy Memleket basshysynyń árdaıym erekshe baqylaýynda. Astana turǵyndarynyń sany jyl saıyn artyp keledi. Bul qala basshylyǵynyń aldyna jańa mindetter men talaptar qoıyp otyr. Shaharymyzdyń árbir turǵyny qalanyń damýyna óz úlesin qosyp keledi. Birlesken jemisti jumys úshin barshańyzǵa jáne áriptesterge alǵys aıtamyn. Jańa ákimniń jumysyna tabys tileımin!» dep túıdi sózin Altaı Kólginov.
Foto: facebook.com/altay.kulginov.3
