Altaı Kólginov 2021 jyly qansha mektep salynatyndyǵyn aıtty
«Barlyq mektepti bıýdjet esebinen sala almaımyz. Sondyqtan jeke ınvestıtsııa úshin de, memlekettik-jekeshelik áriptestik úshin de jaǵdaı jasaýǵa tıispiz. 2019 jyly 6, 2020 jyly 11 mektep saldyq. 2021 jyly 15 mektep salyp jatyrmyz. Bul eki aýysymda oqyǵan kezde 40 myń oqýshy ornyn qamtamasyz etedi degen sóz. 2020 jyldyń qorytyndysynda úsh aýysymdy mektepterdiń sanyn 2 esege, 8-den 4-ke deıin, al oqýshy sany artyq mektepterdiń sanyn 22-den 14-ke deıin qysqarttyq», - dedi ol Nur-Sultan qalalyq máslıhatynyń kezekten tys sessııasynda.
Degenmen, elorda ákimi jańa bilim ordalalaryn salý jumysy toqtalatyn bolsa, atalǵan mektepterdiń barlyǵy qaıtadan 3 aýysymda bilim berýge májbúr bolatyndyǵyn basa aıtty.
«Oǵan jol bere almaımyz. 2 jyldyń ishinde jekemenshik mektep qurylysyna qatysty 36 jeke jobaǵa qoldaý kórsettik. Onyń bir bóligi búginde júzege asyrylyp jatyr jáne bul mektepter bıyl esikterin ashatyn bolady. Qazirdiń ózinde bul mektepter úlken suranysqa ıe bolyp otyr. Bul óte mańyzdy jumys. Kelesi jyly da osynshama mektep salamyz», - dedi Altaı Kólginov.