Altaı Kólginov 2 myńnan astam áleýmettik páter salynyp jatqan shaǵyn aýdanǵa bardy
«Qala — tiri organızm ispettes, al ol tolyqqandy jumys isteýi úshin barlyq salany jetildirý qajet. Mysaly, turǵyn úı jáne basqa da nysandy salý kezinde úılerdi jylýmen, elektrmen jáne basqa da kommýnıkatsııalarmen qamtamasyz etý kerek, al joldar, balabaqshalar, mektepter, medıtsınalyq mekemeler salý úshin ınjenerlik jeliler júrgizý qajet. Osy tujyrymdamaǵa sáıkes elorda aýdandary ortalyqtandyrylyp damyp keledi», — dep jazdy elorda ákimi jelidegi paraqshasynda.
Ákim qalany aralap júrip, áleýmettik qoljetimdi turǵyn úı qalaı salynyp jatqanyn qarap shyqty. Onyń aıtýynsha, qalanyń barlyq aýdanynda, sonyń ishinde eldi mekenderde jeńildikpen beriletin baspana salynyp jatyr.
«Búgin «Otaý» shaǵyn aýdanyna (Almaty aýdany, Metro mańaıy) bardym. Onda qoljetimdi jeńildikpen beriletin turǵyn úılerden turatyn shaǵyn aýdan bolady. Bul shaǵyn aýdanda kezekte turǵandarǵa (onyń ishinde Otbasy bankinde kezekte turǵandar úshin) arnalǵan áleýmettik páterlerdiń jalpy sany 2 myńnan asady.
Shaǵyn aýdanda balabaqsha, mektep salýdy, sol sııaqty medıtsınalyq mekeme, demalys oryndaryn, azyq-túlik dúkenderin jáne t.b. qarastyrýdy tapsyrdym», - dedi Altaı Kólginov.
«Bıyl Memleket basshysynyń tapsyrmasy boıynsha áleýmettik turǵyn úı sanyn arttyramyz. Mysaly, 2018 jyly 1 800 áleýmettik páter salynǵan bolsa, bıyl bul kórsetkishti 10 myńǵa deıin jetkizemiz, sońǵy 3 jylda áleýmettik turǵyn úı sany 5 eseden asa artty.
Sondaı-aq Elbasynyń bastamasymen qolǵa alynǵan «Jumys isteıtin jastarǵa jalǵa beriletin turǵyn úı» baǵdarlamasy bıyl da jalǵasady. Budan bólek, turǵyn úı sertıfıkatynyń somasyn 1 mln teńgeden 1,5 mln teńgege deıin ulǵaıttyq, Qazaqstandyq turǵyn úı kompanııasynyń (QIK) baǵdarlamasy boıynsha qatysýshylar sanatyn keńeıttik», - dedi ákim.
